Wa Ayăi lah ƀon lan tuch tăm blău ta ƀon K’Tu, xă Kon Gang, nkuăl Đak Đoa, n’gor Gia Lai an gĭt: Năm bah năp cà phê, sầu riêng dơi săk play da dê, tăch peh, kônh wa rhơn ngăn. Êng rnăk wa geh 700 tơm sầu riêng ntil Monthong, săk geh rlău 30 tấn, tăch đah rnoh bah 80 rbăn prăk/kg, nsĭt geh rlău 2 rmen prăk. Mô knŭng êng rnăk wa Ayăi, âk rnăk tâm ƀon K’Tu geh prăk âk bah sầu riêng n’hanh cà phê, ntĭt nsa kơt: rnăk wa Kôch, nô Quứ, nô Quý, mô lah rnăk nô Hý... geh prăk rlău 1 rmen bah cà phê, sầu riêng. Ăp rnăk n’gôn ndrănh yăng, djăr ri geh ơm tâm nong, rwăt tay ndơ sa, dak ngêt... gay tâm pă nău răm jêh du năm pah kan jan sa.

 Năm aơ cà phê khlay, ƀư sa dơh lơn đŏng, yor rnoh cà phê hao khlay, rnăk wâl răm ngăn. Tơm sa play, ba lŏ dơi geh khlay đŏng. Uănh nsum nău răm âk lơn. Tết tât rnăk wâl ƀư sa tết đah kon sau, geh djăr, kik, ndrel ngêt sa răm năm mhe.

Ƀon K’Tu aƀaơ geh 270 rnăk, lĕ rngôch lah nuĭh Bahnar, geh 99%. Ƀon geh nklăp 2.000 ha neh tuch tăm, dŭt âk tăm tơm jŏ năm kơt cà phê, cao su, tiêu. Nuĭh ƀon lan tâm ƀon lĕ tâm rgop tăm 400ha cà phê tĭng tâm di 4C, tăm tiêu kloh uĕh n’hanh kơt dŏng ntrong ƀư tăm sầu riêng tâm srah tâm mir cà phê. Âk rnăk geh prăk du năm bah rhiăng rkeh tât rmen prăk. Wơt tết Ất Tỵ tâm mông nar răm rhơn, wa Nô an gĭt, năm bah năp rnăk wâl geh rlău 1 rmen prăk bah 4 ha cà phê.

Tết năm aơ mô knŭng rnăk wâl gâp ma kônh wa tâm ƀon ăp nuĭh rhơn yor cà phê hao khlay. Tết lah di tâm rgum rnăk wâl, ndrel ngêt sa, ntrŭt nsôr nsrôih pah kan jan sa gay nău rêh dơi sâm geh, yor bah năp đaơ jêr jŏt ŏk r’ah âk. Lah uĕh Ngih dak uănh mĭn, nta an kônh wa mpôl hên jêng nău rêh rnăk wâl aƀaơ dŭt đăp mpăn.

Wa Ranh, công chức Văn hóa-Xã hội xă Kon Gang, nkuăl Đak Đoa, n’gor Gia Lai an gĭt lam xă geh 5 thôn ƀon, đah bơi 1.120 rnăk, rlău 4.440 nuĭh, tâm nĕ rnoi mpôl đêt rlău 690 rnăk, dŭt âk lah nuĭh Bahnar. Ăp trong ƀư, nău kơl đah kônh wa dơi tŏng ăp, ngăn lah nău mât uănh nău rêh tâm rơh Tết Nguyên đán.

Ăp rơh tết tât, ăp nuĭh geh soan đah cách mạng dơi Ngih dak an ndơ tết jêng ăp jay dơi sa tết, răm năm mhe. Ăp rnăk ach o, jêr jŏt ri dơi n’gâng kan ƀon lan ntop kơl phe, mì tôm, ƀănh kĕo, dak ngi... gay lĕ rngôch ăp nuĭh dơi sa tết răm m’ak, hơm răm, mô an du hê mô geh Tết.

Ăp ndơ Tết kơt: phe m’êt, ƀănh kĕo, dak ngih n’hanh prăk măt dơi an tât ty ăp rnăk wâl dơi kơl, ƀư tĭng nău way “Ngêt dak nkah gĭt tu dak” bah rnoi nuĭh Việt Nam. Wa Blưch, 66 năm deh, nuĭh geh soan đah cách mạng nkoch:

 Lah uĕh ngih dak, ăp năm bah năp uănh tât mro, kơl an rnăk wâl, geh prăk măt 500 rbăn prăk, jêh nĕ ƀot ngŏt, dak mắm, dak ngi, ƀănh kĕo... Knơm nău kơl aơ rnăk wâl geh tết uĕh lơn, geh tay biăp tăm ta jay, djăr mât êng, rnôk kon sau tât khâl, răm tết gâp saơ dŭt răm. Lah uĕh ngih dak uănh tât mpôl hên.

Tât khâl xă Kon Gang tâm rơh bôk năm mhe 2025, wa Đinh Ơng, Groi Kruanh UBND nkuăl Đak Đoa, n’gor Gia Lai răm rhơn djăt nău mbơh, tâm năm bah năp xă lĕ n’hŭch ach o rlău 70 rnăk ach o. Geh 8 rnăk jêr jŏt dơi ntop kơl prăk ƀư jay. Lơn lah, nu nău rnă njrăng chính trị dơi mât nâp, kônh wa tâm rnglăp, ndrel soan ndâk njêng ƀon lan ndrŏng uĕh.

Xă Kon Gang lah nkual 2, bah năp kônh wa dŭt jêr jŏt, yor mô gĭt trong ƀư sa. Yơn aƀaơ kônh wa lĕ gĭt kơt dŏng khoa học kỹ thuật tâm pah kan jan sa, jêng nău rêh wăng sa bah nuĭh ƀon lan dôl hun hao. Tết năm 2025 aơ knơm cà phê, tiêu... hao khlay, nău rêh nuĭh ƀon lan dơi hao, sa Tết răm lơn. Rhơn lơn lah kônh wa tâm rnglăp mro, nâp nâl rnă njrăng ta ntŭk.

Dơi geh nău mât uănh bah Đảng n’hanh Ngih dak, nău rđău dŭt n’hâm bah n’gâng kan ƀon lan ta ntŭk, n’hanh nsrôih mô rlu bah nuĭh ƀon lan, wăng sa rêh jêng ta xă Kon Gang, nkuăl Đak Đoa, n’gor Gia Lai lĕ geh âk nău rgâl; nău rêh nuĭh ƀon lan mô rlu dơi hao. Du yan năm mhe lŏ sĭt ta nkual neh ndrŏng yor sầu riêng n’hanh cà phê. Ƀô kah bah cà phê, njŭng bah sầu riêng lĕ n’hanh dôl nsĭt tay nău rêh hơm răm an nuĭh ƀon lan Kon Gang.