Wa Ngô Thị Kim Xuyến, ta tổ dân phố 1, nkuăl têh Quảng Phú, nkuăl Cư M’gar an gĭt:

Gâp dŭt rhơn, rhơn âk nar aơ mô bĭch mrô. Gâp lah uĕh Đảng, Ngih dak n’hanh rmôt kông an ƀư an rnăk wâl geh du mlâm jay gay gŭ, rhơn ngăn.

Hôm yuh H’En Niê ta ƀon Kmiên, xă Ea Drông, nkuăl têh Buôn Hồ ri rngot nkoch tâm nar ntơm ndâk ƀư jay mhe kơt aơ:

Dŭt rngot, mô gĭt nău nkoch tay, dŭt geh nkô̆, geh jay gŭ an rnăk wâl dơi ndê mih, ndê duh. Bah kơi aơ 2 hê ur sai gơih pah kan jan sa, nsrôih gay hun hao wăng sa.

 Ăp mklâm jay aơ mpeh tâm Bôk nău rgop an tâm nchră ƀư mhe 4.285 mlâm jay an rnăk ach o, rnăk êp ach o ta lam n’gor Dak Lak (kuăl lah Bôk nău rgop an tâm nchră 214) yor Kông an n’gor ƀư tơm, ƀư tĭng bah bôk khay 3 năm aơ. Tĭng nĕ, đah dĭng lĕ prăk bơi 343 rmen prăk, du mlâm jay ƀư mhe dơi ntop kơl 80 rkeh prăk, tâm nĕ 60 rkeh prăk bah tơm prăk ntop kơl bah trung ương n’hanh 20 rkeh prăk bah tơm prăk bâh n’gor. Ndrel đah nĕ, bôk nău rgop an tâm nchră ntop kơl nkra 1.120 mlâm jay đah rnoh ntop kơl 30 rkeh prăk du mlâm jay.

Bah kơi n’gul khay mbơh ƀư, lĕ geh 1.026 mlâm jay mpeh tâm bôk nău rgop an tâm nchră 214 dơi ntơm ƀư, nchrăp jêh tâm khay 4 tât. Thiếu tướng Lê Vinh Quy, Giám đốc Kông an n’gor Dak Lak an gĭt, jêh rnôk lôch nău kan kông an gưl nkuăl, n’gor jao an kông an gưl xă, phường, nkuăl têh mbơh ƀư đah nău ŭch nsrôih jêh ndâk ƀư 4.285 mlâm jay tâm lvang 5 khay n’gul.

Nsrôih jêh ngăch tât lơ 15/8/2025. Mpôl hên lĕ mbơh ƀư tât ăp đồng chí kruanh kông an 180 xă, phường, nkuăl têh gay ăp đồng chí tâm ôp tâm nchră tay an gưl ủy, n’gâng kan ƀon lan n’hanh rmôt kan tahen ndrel ăp rmôt bah gưl ủy, n’gâng kan ƀon lan, dŭt n’hâm ntop kơl an kônh wa ndâk ƀư ăp ndơ aơ đăp mpăn mông nar, ngăch n’hanh uĕh nâp.

Ndrel đah bôk nău rgop an tâm nchră 214 yor kông an n’gor ƀư tơm, ta n’gor Dak Lak geh 3 bôk nău rgop an tâm nchră êng dôl ƀư tĭng đah nău rƀŏng ndâk ƀư 3.027 mklâm jay ntop kơl rnăk dơi kơl, nuĭh geh soan, rnăk ach o, rnăk êp ach o. Ăp bôk nău rgop tâm nchră aơ dơi tâm pă prăk bah n’gor gay mbơh ƀư. Wa Nguyễn Hải Đông, Bí thư Nkuăl ủy Krông Búk an gĭt, nkuăl dŭt n’hâm jêh nău ndâk ƀư n’hanh nkra 141 mlâm jay bôk yan mih:

Mpôl hên lĕ n’gluh an nău rƀŏng jêh lĕ rngôch ndâk ƀư n’hanh nkra lĕ rngôch ăp jay bah năp lơ 15/7 tât. Mpôl hên ntĭm rđău dŭt n’hâm ăp gưl, ăp ban, ăp doanh nghiệp kơt ăp ntŭk rgum gay mpôl hên jêh bah năp nar nkôp đah n’gor n’hanh du đêt ntŭk rƀŏng tât mbah rhơn nklah gĭt nar Cách mạng khay 8 lôch jêh.

Đah nău nsrôih, ndrel ty bah lĕ trong chính trị ta Dak Lak, ăp jay nâp nâl dôl ngăch rgâl ăp jay truh sat. Jay mhe mbra ntop tay nuih n’hâm gay ăp rnăk rlet rlău jêr jŏt, nsing nơm tay tâm ăp nău kơl, nău ntrŭnh bah Đảng n’hanh Ngih dak, dŭt n’hâm hao tâm nău rêh.