Neh ntu lah tơm ndơ mpêt khlay an nău hun hao wăng sa- rêh jêng kon nuĭh bah n’gor Dak Lak. Đah rnoh hvi rlău 13.000 Km2 ta nklang nkual Tây Nguyên n’hanh geh neh ntu mha êng, nău mât n’hanh dŏng geh nău tam tơm neh mbra kơl n’gor ntrôl dăng hun hao wăng sa- rêh jêng kon nuĭh, tât rnoh hun hao 8% ma Chính phủ hŏ jao.

Đah rnoh hvi rlău 35.700 hec-ta, tâm nê rlău 90% neh tuch tăm, nkuâl Krông Búk, n’gor Dak Lak uănh nău geh dăng bôk năp bah he lah tăm ăp ntil tơm jong năm. Wa Nguyễn Hải Đông, Bí thư huyện ủy Krông Búk an gĭt, nkuâl dôl rgum rdâk njêng trong nchrăp dŏng neh tât năm 2030, gay đăp mpăn tâm pă tâm di đah ăp ntil neh dŏng an hun hao wăng sa rêh jêng kon nuĭh.

“Nkuâl dôl manh ăp nuĭh rnâng kan mbơh nti an ƀư ăp njuat gay tŏng di đah nău ŭch geh nsum bah n’gor, bah trung ương. Rnôk dơi geh pah kan dja ri nău kuăl jă ntuh kơl tâm ban kơt rdâk njêng ntung trong ndơ dŏng rdâk njêng, kơl neh an ƀon lan mbra đăp mpăn. Lah dơi nău dja ri rnoh tât mpeh hun hao wăng sa rêh jêng kon nuĭh n’hanh rnoh tât rlău 8% mpŏng mbra dơi tât geh”.

Geh lĕ rngôch neh bri hao 176.000 hec-ta, Ea Súp lah nkuâl geh tơm neh dŭt âk Dak Lak. Yơn lah, aơ lah ngoăy tâm ăp nkuâl dŭt ach o n’gor; du gâl nkô̆ khlay lah mpŭng lir tơm neh rnôk bar pe jât rbăn ha neh tâm ăp ntŭk nchrăp kan n’hanh geh nuĭh ƀon lan rŭn in. gay nkra bah nkô̆ nău dja, nkuâl dôl nsrôih tĭng ƀư ăp trong sŏk mplơ̆ neh geh rŭn in njêng geh neh soih, wăch rgum doanh nghiệp geh nău dơi ntuh kơl. Đah ăp nău nsrôih dja, nkuâl Ea Súp mpŏng mô dơn pơk luh trong hun hao tuch tăm têh hvi ma hôm rƀŏng tât wăch rgum ăp ntŭk nchrăp kan tuch tăm công nghệ mhe đŏng, rgop n’hao rnoh khlay tuch tăm, n’hao nău geh wăng sa nău rêh bah nuĭh ƀon lan. Wa Đỗ Xuân Dũng, Groi bí thư huyện ủy Ea Súp lah rjăp:

“He mbra dơi lah soih aih mpeh neh ntu gay hun hao tuch tăm, si gle ta nkuâl Ea Súp lah dŭt têh. Jêng nkuâl Ea Súp kuăl jă ăp nuĭh ntuh kơl tât đah Ea Súp dơn tay ăp rnoh neh ma mpôl hên nchrăp sŏk mplơ̆ dja gay mât dŏng, ntuh kơl tuch tăm, hun hao tuch tăm si gle tĭng dăp rgum n’hanh tĭng quy định bah pháp luật”.

Lah rjăp nău khlay bah tơm neh ntu tâm trong nchrăp hun hao wăng sa- rêh jêng kon nuĭh bah n’gor, tâm nar pah kan lor bôk năp đah Sở Nông Nghiệp n’hanh Môi trường n’gor Dak Lak lôch dăp rgum glêh tam nuĭh kan (n’glăp dơn ngoăy Sở Nông Nghiệp n’hanh Phát triển Nông thôn đah Sở Tài Nguyên n’hanh Môi Trường), wa Nguyễn Thiên Văn, Groi kruanh UBND n’gor an gĭt: N’gor dôl ƀư du rut âk trong nkra gay mât dŏng geh nău tam tơm ndơ dja. Tâm nê pah kan sŏk mplơ̆ neh geh rŭn in ân ƀư lĕ n’hâm suan, ndrel đah nê lah ra ŭanh tay, rgâl di tay dăp rgum dŏng neh dơi an ƀư ăp kôp, đăp mpăn tâm di đah tĭng nkual n’hanh rƀŏng trong hun hao nsum bah n’gor. Wa Nguyễn Thiên Văn dăn đă Sở Nông Nghiệp n’hanh Môi trường rgum ƀư dĭl nkô̆ nău dja:

“Ntrôl ngăch ƀư đă ntrơn du sŏk mplơ̆ neh đah neh geh rŭn in ân ƀư ngăch dĭl, yor he hŏ rdâk njêng trong nchrăp sŏk mplơ̆ lĕ rngôch neh geh rŭn in ta n’gor n’hanh lôch rnôk sŏk mplơ̆ neh geh rŭn in ri ân nsŏng kơl an uỷ ban nhân dân n’gor gay mbơh ban thường vụ tỉnh uỷ mpeh trong nchrăp dŏng neh lôch sŏk mplơ̆, dăn đă ăp oh nô ân ndăn ngăch ƀư nkô̆ nău dja ri mơ ăp kôp n’hanh tĭng ƀư jăp nghị quyết bah n’gor đảng bộ tâm ban kơt nău rđău đă bah trung ương”.

Mât n’hanh dŏng geh nău tam neh ntu mpŏng mô dơn kơl Dak Lak dơi tât rnoh hun hao wăng sa 8%, ma hôm njêng jâng nsing nâp dăng an nău hun hao jŏ jong. Đah ăp trong nkra ƀư tâm di, ntơm bah dăp rgum tâm di, ntuh kơl ntŭk ntô ndơ dŏng, wăch rgum doanh nghiệp tât mât njrăng ntŭk gŭ rêh. Dak Lak mbra mât dŏng ntêr lĕ săk geh neh ntu, ƀư ntŭk dja jêng suan ntrôl khlay gay n’hao săk geh nău rêh ƀon lan n’hanh ntrŭt ntrôl wăng sa n’gor nar lơn ma hun hao./.