Nkhêp di nkah gĭt 50 năm rklaih đăp mpăn n’gor Lâm Đồng (3/4/1975-3/4/2025), Quang Sáng gŭ ta Tây Nguyên nkoch ăp nău rgâl n’hanh geh hao ta nkual neh aơ.

Xă Đạ Chais, nkuăl Lạc Dương n’gor Lâm Đồng, tă nkual ƀon têh Đà Lạt nklăp 60 km tĭng trong quốc lộ 27C hăn let dak lênbg. Tahen ơm K Să Ha Tam, 83 năm deh, nuĭh K’ho ta thôn Tu Poh, xă Đạ Chais, an gĭt, âk nuĭh kon bah ƀon lan lĕ khĭt ta play neh aơ n’hanh dơi nchih săk ta Rup ndah nkah gĭt bah nkuăl. Wa rngot nkoch tay ăp nău druh ndăm âk nău njê rnôk hăn râng mât mpôn cán bộ, ƀư tâm mâp n’hanh anh ndrăk nsiu rhŏ an ntŭk tâm lơh.

Gâp n’gon piăng ri an n’gon kah, kâp ŭnh mô an nsuk, geh nsuk ri ndeh păr bah rlăng saơ n’hanh pănh, n’gon piăng mât tahen. Gâp ƀư jao mâp rnôk 18, 19 năm dơm, hôm hăn druh ndăm xung phong anh ndrăk nsiu ri 20 năm. Rnôk dôl druh ndăm xung phong, klach ngăn lah mâp rnôk B52 ntŭp bom lĕ njăr dâl. Di lah gâp khĭt tâm rnôk nĕ hôm, rnôk nĕ mâp ndeh păr ntŭp bom khĭt 7 nuĭh tâm rmôt hôm.

Ntô̆ n’hao mpeh du rơh druh ndăm râng tâm lơh rklaih đăp mpăn ƀon tơm, tahen ơm K’Dĩnh, 82 năm deh, nuĭh K’ho, ta xă Lộc Nam, nkuăl Bảo Lâm, n’gor Lâm Đồng, nkoch, nău nsơr bah druh ndăm bah năp dôl kơl ƀon tơm neh dak nar lơ uĕh lăng.

Ƀon lan râng cách mạng, rgop ba phe mât tahen. Du jay geh ntrong leo rgop phe an tâm yăng, kuăl lah yăng phe mât tahen. Nuih n’hâm bah nuĭh ƀon lan ndrĭ jêng tât nar rklaih đăp mpăn dâl. Bah nar đăp mpăn nău rêh nuĭh ƀon lan hao, đăp mpăn, nsrôih ƀư sa. Aƀaơ trong hăn dŭt uĕh hăn nsong dơh hôm, ƀon lan n’hanh Ngih dak ndrel ƀư, Ngih dak ntuh kơl trong hăn kloh uĕh, nar lơ uĕh lơn. Lah ngăn, ƀon lan aƀaơ knŭng rwê rgum ƀư ndrŏng dơm.

 50 năm jêh nar rklaih đăp mpăn, ăp nkual rnoi mpôl đêt bah n’gor Lâm Đồng lĕ rgâl săk. Wa Bon Yô Soan, Groi Kruanh Ủy ban Mặt trận Tổ quốcViệt Nam n’gor Lâm Đồng an gĭt, aƀaơ rnoh rnăk ach o âk trong tâm n’gor knŭng hôm bah dâng 2%, tâm nĕ rnăk ach o nuĭh rnoi mpôl đêt bah dâng 5,5%. Mât uĕh nuih n’hâm tâm rnglăp, kônh wa ăp rnoi mpôl đêt dôl ndrel ty ndâk njêng ƀon tơm têh ndrŏng.

Aƀaơ nuĭh ƀon lan lĕ gĭt rgâl ntĭl tơm tăm mpa rong, gĭt kơt dŏng ăp ndơ khoa học kỹ thuật tâm nkra njêng. Gâp mĭn tâm năm tât mbra geh nău rgâl uĕh lơn đah ƀon lan bah n’gor Lâm Đồng lah nsum, tâm nĕ geh nuĭh rnoi mpôl đêt lah êng.

N’gul rach năm lĕ rnglău, ăp nkual neh bom mìn kăl e aƀaơ lĕ jêng ăp xă thôn ƀon mhe hun hao. Kônh wa ăp rnoi nuĭh ta Lâm Đồng dôl nsing nơm ndrel neh dak lăp lvang hun hao mhe./.