VOV4.M'nông:  Đah nău way ơm tâm rnglăp, tâm têk ndrêng, tâm kơl nsum bah rnoi nuĭh, lôch nău ôp kuăl bah Kruanh dak n'hanh Mpôl kruanh Uỷ ban Trung ương MTTQ Việt Nam, âk nhih pah kan, đơn vị, mpôl kan, ăp nuĭh hŏ mât uĕh nău dơn kan, uănh tĭng nău geh n'hanh nău dơi bah he, râng rgop kơl ƀư prăk nkrem njrăng, n'gang nuh srê Covid-19. Aơ lah tơm ndơ dŭt n'hâm têh kuâng gay ndrel Chính phủ ntop kơl rmôt kan dak si, ăp nuĭh hăn pah kan na nê̆ ta ăp nkual an gŭ rgum êng tâm ban kơt njêng tơm ndơ ƀư chuh vaccine an ƀon lan lam dak.

Jrô kan wơt "nuih n'hâm uĕh lŏng" kơl prăk nkrem njrăng, n'gang nuh srê Covid-19 ta Ủy ban Trung ương MTTQ Việt Nam ăp nar dja way pơk mpông wơt ăp mpôl, ăp nuĭh, ăp doanh nghiệp, nuĭh lŏng nuih n'hâm tât nsum ti ndrel Chính phủ njrăng n'gang Covid-19.

         Ndjôt 131 rkeh prăk bah Hiệp hội ƀon lan Việt Nam ta Ma Cao (Trung Quốc) sĭt dak kơl prăk nkrem njrăng, n'gang nuh srê Covid-19, wa Nguyễn Thị Hương mĭn lah: ƀon lan he gŭ dak bah dih way tĭng groi nđôi nô nău nuh srê tâm dak, ŭch rŏng ăp nău rgop tât đah rmôt kan dak si, ăp nuĭh hăn pah kan na nê̆ but săm, gay rgop ntrôl rŭch nuh srê Covid:

“Mpôl hên hŏ rgop nsum đah Tổng lãnh sự quán Việt Nam n'hanh Hiệp hội ƀon lan Việt Nam ta Ma Cao gay ƀư ăp rơh hop ƀon lan tay n'hanh ndrel kuăl jă. Ƀon lan dŭt ŭch tĭng, yor rnoi mham kon său lạc hồng bah he, ah ntŭk hăn ri dŭt rƀŏng sĭt ƀon tơm. Yor kơt nê̆, jêng mpôl hên hŏ kuăl jă n'hanh dŭt geh nău tam”.

Tĭng nău kuăl jă bah Kruanh dak Nguyễn Xuân Phúc: neh dak dŭt ŭch geh nău nsum ti rgop suan bah ăp nuĭh ƀon lan”. Ăp nar rlău aơ, nhih pah kan hŏ rgŏ jă công chức, viên chức ăp nuĭh du nar prăk khay rgop kơl njrăng n'gang nuh srê. Ta Bộ Nội vụ, lôch rnôk rgŏ jă hŏ nsĭt geh rnoh prăk rlău 430 rkeh prăk, lĕ rngôch rnoh prăk dja hŏ dơi njuăl tât prăk nkrem njrăng, n'gang nuh srê Covid-19 gay rgop suan tĭng ƀư ăp trong njrăng n'gang nuh srê. Chánh văn phòng Bộ Nội vụ, wa Vũ Đăng Minh an gĭt:

“100% cán bộ công chức bah Bộ Nội vụ hŏ du rơh tĭng nar rgŏ jă. Cán bộ công chức Bộ Nội vụ ŭch rŏng he geh trong njrăng n'gang nuh srê dŭt uĕh gay mât kân bah. Mhâm ƀư nking nchăng nuh srê ơm đăp mpăn nău rêh gay hun hao neh dak. Yơn nău khlay rnoh prăk bol ma đêt, yơn bôk năp uănh khlay ntuh kơl, trong kơl năn ngăch an ăp cán bộ dak si ta bôk trong rlong sial njrăng n'gang nuh srê. Yor trôk duh oh yuh dŭt lêt rgănh”.

Ndơ̆ rnoh prăk 300 rkeh prăk kơl ma trong Ủy ban Trung ương MTTQ Việt Nam, Groi Tổng giám đốc Radio nău ngơi Việt Nam Vũ Hải Quang an gĭt ăp cán bộ, công chức, phóng viên, biên tập viên, nghệ sỹ bah Radio nău ngơi Việt Nam kơl rnoh prăk 300 rkeh prăk đah nău mpŏng rgop tay tơm ndơ gay ndrel Đảng, Ngih dak, Chính phủ nking nchăng nău ntưp rêng bah nuh srê tâm lam ƀon lan. Bah meng nău rgop ndơ, tâm bah ri aơ nơh, Radio nău ngơi Việt Nam hŏ nsrôih nkoch trêng njrăng n'gang  nuh srê đŏng:

“Đah nău ƀư lah du nhih pah kan nkoch trêng têh bah Đảng, bah Chính phủ, mpôl hên ntêm an âk mông nkoch nău mhe lư n'hanh ăp nău kan tâm njrăng, n'gang nuh srê Covid-19. Way đă phóng viên hăn gŭ ta nkual rƀah gĭt nău lư nuh srê đŏng, nkoch trêng ăp nău dơi tâm nău rđău đă bah Đảng n'hanh Chính phủ. Nău tĭng ƀư rnoh tât ndrop nkre rdâng lơh nuh srê n'hanh nkre hun hao wăng sa; nkoch rnê nuĭh ntĭt leo lor tâm ban kơt ăp mpôl kan ta bôk trong rlong sial dŭt n'hâm ŏ r'ah n'hanh an roh lĕ ma săk jăn".

Ăp rnôk dŭt jêr jŏt lah ăp rnôk gay nuĭh ƀon lan mpơl nuih n'hâm tâm rnglăp, ndrel dâk kan n'hanh geh nău dơn kan yor an ma neh dak, ma ƀon lan. Âk doanh nghiệp n'hanh âk nuĭh hŏ mpư n'hao nuih n'hâm tâm rnglăp, tâm mât tâm kơl "uănh nuĭh tâm ban ma uănh săk he nơm", "lha uĕh nkrum lha sat". Ntơh măt ăp doanh nghiệp, ngân hàng n'hanh ăp nuĭh tâm kơl: “Gâp mĭn lah, nău ŭch tât kơl êng, nê lah tât bah nuih n'hâm uĕh lŏng. Ntơm bah nuih n'hâm hŏ lăp jru tâm săk bah ăp nuĭh ƀon lan Việt. Nău dơn kan ri rlău ma nkô̆ nău dâk kơl êng, ŭch êng, ăp nuĭh uănh saơ nău dơn kan ân nsum ti ndrel chính phủ, ndrel nsum mpôl lam ƀon lan".

        Lah ngăn mbra dŏng di nău kan, mbơh kloh rvah, mbơh gĭt lam n'hanh geh nău tam prăk ma doanh nghiệp, nuĭh lŏng nuih n'hâm kơl an Prăk nkrem njrăng n'gang nuh srê Covid-19, Groi kruanh Ủy ban Trung ương MTTQ Việt Nam Trương Thị Ngọc Ánh an gĭt: Aơ lah du tơm ndơ dŭt têh gay rvăt vaccine chuh an ƀon lan lam dak, gay ntop kơl an rmôt nai dak si, ăp nuĭh hăn pah kan na nê̆ but săm ji mô lah pah kan ta ăp nkual an gŭ rgum êng tâm ban kơt nta geh tơm ndơ rvăt năp ndơ dŏng kan dak si rhŏ dŏng an pah kan njrăng, n'gang nuh srê Covid-19:

“Đah ăp tơm ndơ geh rgŏ jă bah Trung ương, mpôl hên kan nsum đah Ƀan rđău đă gưl neh dak njrăng n'gang nuh srê Covid-19 gay đăp mpăn pah kan mât, dŏng tơm prăk kơl bah ăp doanh nghiệp, ăp nuĭh lŏng nuih n'hâm, đăp mpăn di nău kan, ân dŏng geh nău tam tơm prăk dơi geh rgŏ rgum".

Suan dăng tâm rnglăp, lam ƀon lan rdâng lơh nuh srê"- ăp mpôl ntơh măt an doanh nghiệp, ăp ntŭk kan, ăp nuĭh tât kơl ta Ủy ban Trung ương MTTQ Việt Nam ăp nar dja lah an saơ kloh aơ mô dơn lah ngơi dơm ma mbung, ma lah du nău kan ngăn ngăn khuh n'gôr mpeh nuih n'hâm tâm rnglăp, du nău way ơm khlay bah rnoi nuĭh. Nuih n'hâm nê lơn ma tâm jêr jŏt, lơn ma sol ang lơn han săk n'hanh nuih n'hâm rôih sŏng kon nuĭh Việt Nam./.

Lại Hoa - VOV1- Nuĭh rblang: Điểu Thân