VOV4.Mnông- Ngih nti Phổ thông dân tộc bán trú Trung học cơ sở Krong ta nkual njru ngai xã Krong, nkuăl Kbang, n’gor Gia Lai. Ta meng nău ntĭm nti, ăp nai nti hôm nha dŏng nău rŏng gay ma rgŏ jă kon hoc rnoi đê̆ tât ta ngih nti.

          Mhe ơm ôi rŭk nar ngoăy bôk pơh, ăp nai nti ta ngih nti Phổ thông Dân tộc bán trú Trung học cơ sở Krong lĕ dâk nsoh ao răm, nsoh ao mih gay ma tât ƀon Tung Gút, ngai đah ngih nti klâp ma 10km, joi kon hoc. Tât bôk ƀon, nô Đinh Uýt, kruanh thôn Tung Gút lĕ ơm kâp, ndrel đah nău nti pă tĭng rmôt, tât ta ăp jay gay ma rgŏ jă ăp oh hăn nti tay. Bơi tât 7 mông ôi, lĕ geh 6 kon hoc ta ti njôt kho ao gŭ ba kơi ndeh máy ăp nai nti gay ma rdeng tât ngih nti. Kruanh thôn Đinh Uýt, an gĭt.

          “Rơh aơ lah bar tơ̆ gâp tâm rgop đah ăp nai nti gay ma rdeng kon hoc sĭt ngih nti, rnôk rĭ tâm rgop đah ăp ntŭk kan, n’gâng kan, đảng viên ta ƀon tâm rgop tay gay ma ăp oh tât ngih nti, tât jrô nti. Geh rnôk rƀŭn nchră mbơh tơih ta ƀon, geh rnôk tâm rgop đah mê̆ bơ̆ kon hoc nkah mbơh oh kon tât ngih nti, tâm rgop đah nai nti rgŏ jă ta rnôk măng”.

          Lah ngoăy tâm âk nai nti dŭt mom bâh ngih nti, nai nti Nguyễn Quốc Triều Nkoch tay, âk tơ̆ nô n’hanh ăp nai nti khuch ndeh ta trong hăn, chôt prah lŭp ta trong, kho ao mbĕ bŏk lĕ rngôch.

          “ Tâm rnôk pah kan 4 năm rĭ ta rơh bôk năp lah dŭt ŏ r’ah ngăn, trong hăn dŭt jêr. Gâp mĭn tât kon hoc nơm dŭt ŭch an geh gĭt ăp rplay săm ƀŭt, ăp nău gĭt mhe gay ma an geh nău rêh ueh”.

          Ngai đah nklang nkuăl Kbang rlău 40km, ngih nti Phổ thông Dân tộc bán trú Trung học cở sở Krong ta nklang nkual yôk bri. Ngih nti aơ lĕ geh rdâk njêng rlău 17 năm, aƀaơ geh 14 nai nti, đah 322 kon hoc, dŭt âk lah nuĭh Bahnar. Nai nti Phan Danh, groi hiệu trưởng ngih nti an gĭt, tâm ba năp nơh, rnôk nuh srê Covid-19 ntoh luh, kon hoc mô geh ndơ ma nti trực tuyến, ăp nai nti nchih lor nău nti ndơ̆ njŭn tât ăp oh. Bâh n’gul khay 11 aơ, kon hoc plơ̆ tay ta ngih nti.

Yơn lah du đê̆ kon hoc rlu nti âk, nai nti hăn rgŏ jă tay ăp oh hăn ngih nti. Ăp tơ̆ hăn rgŏ jă lah du nău jêr. Nai nti Phan Danh nkoch.

          “Nău nsrôih êng tâm nău nti bâh ăp oh ê hŏ geh, nđâp ma nai nti bu mô ŭch an oh kon nơm hăn nti yor aƀaơ kon hoc nti cấp 2 ăp oh lĕ têh, lĕ gĭt pah kan n’hanh rnăk vâl uănh ăp oh nĕ lah nuĭh pah tơm ta rnăk vâl. Du đê̆ nuĭh rĭ mê̆ bơ̆ mô an kon hăn nti. Du đê̆ nuĭh oh nô hăn rgŏ jă, mê̆ bơ̆ bu ji nuih hôm nha geh mprơh nai nti đŏng jêng nău kan rgŏ jă dŭt jêr ngăn. Lah ma saơ kon hoc plơ̆ tay ngih nti mô hŏ đăp mpăn rĭ ngih nti rgum jă nai nti bâh ntơm kêng măng nar pơh gay ma măng nar pơh n’hanh ơm ôi nar ngoăy nai nti hăn pah kan rgŏ jă mbơh tơih nău kan”.

          Rlet rlău ăp nău jêr jŏt, ăp nai nti ta ngih nti Phổ thông dân tộc bán trú Trung học cơ sở Krong hôm nha dŭt rŏng đah kon hoc, nsrôih đah nău kan. Klâp lah nău rhơn ngăn bâh nai nti ta aơ lah ăp oh kon hoc mô geh nklơi ngih nti, nklơi jrô nti gay ma nău rêh let năp atay rklaih bah nău ach o.

Nuĭh rblang: Thị Đoắt