VOV4.M'nông: Hàn Quốc n'hanh Mỹ nar 10/8 ntơm rơh nti tahen lor bôk năp gay nchrăp an rơh nti tâm lơh ngăn geh moh rơh nti tahen Tiăr nti Sở chỉ huy rgum nsum, nchrăp ƀư tâm pơh bah kơi tay. Nău kan bah lơ nê bah Mỹ n'hanh Hàn Quốc hŏ mâp geh nău nduih lah hô mpeh bah Triều Tiên, nkre ƀư n'hao duh jêr ta gôl dak Triều Tiên. Bah năp nar nti tahen lor bôk năp, Groi kruanh Ủy ban nkoch trêng đảng Lao động Triều Tiên n'hanh lah oh bu ur bah kruanh rđău kan Triều Tiên Kim Jong-un, wa Kim Yo-jong hŏ nduih lah ngăn Hàn Quốc n'hanh Mỹ yor ƀư tay ăp rơh nti tahen nsum; uănh aơ lah nău kan lơh ndjơh êng săk nơm, ntêt nkri nău đăp mpăn bah nuĭh ƀon lan tâm ban kơt ƀư jêng klach rvê an nô nău ta gôl dak Triều Tiên. Oh bu ur kruanh rđău kan Triều Tiên kuăl đă Mỹ rhuăt tahen ndrel ndơ năp dŏng ndrak nsiu phao bleo dŏng an tâm lơh luh bah Hàn Quốc. Wa Kim Yo-jong mbơh njrăng lor đŏng Triều Tiên mbra n'hao dăng lơn đŏng nău dơi njrăng n'gang n'hanh rdôl lơh nkrum lam. Mỹ n'hanh Hàn Quốc mbra geh ntang lơh nhiăl rmal lah ƀư tay ăp rơh nti tahen nsum./.

Nuĭh rblang: Điểu Thân