VOV4.M'nông: Rlău 100 kruanh mât bôk neh dak n'hanh kruanh rđău kan gưl têh bah 132 dak tât râng pơh lễ gưl têh rơh tâm nchră Đại hội đồng Liên hợp quốc tâl 76 ntơm pơk nar 21/9 ta nkual ƀon têh New York, Mỹ. Nar kan dŭt khlay tâm năm bah Liên hợp quốc mpŏng mbra njêng luh suan ntrôl kơl lam ntŭr neh rlău dơi ăp ntul rlong bah rgâl duh nđik trôk nar, nuh srê COVID-19 tât tâm rlong dak têh ndrŏng. Mô kơt năm 2020 rnôk lĕ rngôch nău lah bah ăp kruanh rđău kan lam ntŭr neh dơi rhôp rup lor, năm aơ, rlău 100 kruanh mât bôk neh dak n'hanh kruanh rđău kan gưl têh bah 132 dak tâm lĕ rngôch rnoh 193 dak lăp kan nsum Liên hợp quốc nchrăp mbra geh nău lah na nê̆. Yơn lah, aơ lah du rơh tâm nchră mha êng mô hŏ tă geh bah kăl e. Tĭng Tổng thư ký Liên hợp quốc Antonio Guteres, ăp nău đă ƀư lhăt ntơm bah wăn bok put mbung tât uănh năl COVID-19, ndrel âk trong nkra uănh năl nuh srê êng ƀa ƀă hŏ an saơ nău ntŭl rlong dŭt têh ma lam ntŭr neh dôl tâm rdâng. Ndrel đah Covid-19, rgâl duh nđik trôk nar lah ngoăy tâm ăp nkô̆ dŭt uĕh khlay ta rơh tâm nchră Đại hội đồng năm aơ./.

Nuĭh rblang: Điểu Thân