VOV4.M’nông – Ôi nđaơ (23/7), ntop tay 1.228.500 dĭng vaccine AstraZeneca lĕ dơi rdêng tât nkual ƀon têh HCM. Aơ lah rơh jao vaccine tal 5 n’hanh lah rnoh vaccine âk ngăn bah sa ơm tât aƀaơ tâm sam ƀŭt tâm ton nchăm rwăt lor đah AstraZeneca Việt Nam n’hanh Công ty Cổ phần Vaccine Việt Nam (VNVC), đah nău ntop kơl bah n’gâng kan dak si. Kơt nĕ, kơp tât aƀaơ, tâm ton nchăm rwăt lor đah AstraZeneca Việt Nam n’hanh VNVC (dơi ký khay 11 năm 2020) lĕ djôt sĭt an Việt Nam rlău 3,1 rkeh dĭng, tâm ban nklăp 37% dĭng lĕ vaccine Covid-19 bah AstraZeneca tâm dak. Rnoh ƀa ƀă tât bah Cơ chế COVAX n’hanh ntop kơl ăp ding đah chính phủ ăp dak. Tĭng wa Vũ Thị Thu Hà, Kruanh manh pă trong chuh VNVC, êp tât, âk rkeh dĭng vaccine njrăng Covid-19 bah AstraZeneca mbra dơi djôt sĭt Việt Nam tĭng tâm ton nchăm rwăt 30 rkeh dĭng vaccine bah VNVC.  

Nuĭh rblang: Y Sưng Phê Ja