VOV4.M’nông - Nkual mât ndray ntŭk ntô đăp mpăn geh rnoh neh 22.500 ha ta xă An Toàn nkuăl An Lão, n’gor Bình Định. Ăp lôk bri hon êng, si glê âk ntil dơi rmôt kan n’hanh ƀon lan Ba Na tâm rgop mât njrăng  rjăp yor bri lah “n’ha klơm soh rêh” bah ƀon lan. Nuĭh nchih nău an Đài TNVN ta nkual Miền Trung nkoch mpeh trong kan tâm rgop mât njrăng bri ta aơ.          

                   Khay 7, yan tuh sŭt, du đêt nuĭh ƀon lan hăn tâm bri nkual mât ndray bri An Toàn, nkuăl An Toan, nkuăl An Lão gay sŏk dak sŭt. Âk nuĭh lăp ntŭk gay sŏk ŭnh su gay tuh sŭt jêng geh âk nău ƀư ŭnh sa bri. 230 rnăk ƀon lan nuĭh Ba Na ta xă An Toàn, nkuăl An Lão dơi jao mât njrăng 7.500 ha bri ta aơ way uănh nđôi nuĭh lăp tâm bri. Wa Hồ Văn Kem ta thôn 1, xă An Toàn, nkuăl An Lão dơi jao mât njrăng 60 ha bri krŏng ta nkual mât ndray ntŭk ntô An Toàn. Geh prăk bah mât njrăng bri, wa Kem n’hao lĕ nău kan bah nơm  uănh njrăng rnoh neh bri dơi jao. Wa Kem n’hanh đah 5 nuĭh Ba Na tâm thôn ndâk njêng du rmôt uănh nđôi bri nsum. Du khay, uănh nđôi 2 tơ̆ wa ƀa ƀơ hăn tâm bri, ơm saơ nuĭh êng lăp tâm bri.

Nuĭh Ba Na ta xă An Toàn, nkuăl An Lão, n’gor Bình Định râng mât bri

         “Hăn uănh nđôi ăp khay, ăp pơh lah saơ nuĭh êng lăp tâm bri gâp hăn mbơh đah Ban Mât uănh, UBND xă gay uănh nđôi rjăp, nhŭp kân ăp nuĭh lơh phah bri bah nơm. Ngih dak uănh mĭn, nuĭh ƀon lah dơi mât uănh, njrăng n’gang bri ri gâp dŭt rhơn đŏng, geh prăk ăp năm an nău rêh”.

                   Nkual mât ndray ntŭk ntô An Toàn kâng n’har đah xă nkual prêh ăp nkuăl Hoài Ân, Vĩnh Thạnh, n’gor Bình Định n’hanh du đêt nkuăl nkual yôk ăp n’gor Quảng Ngãi, Gia Lai. Rlău ma ăp trong hăn tâm xă, nkuăl, ta aơ geh âk trong hăr jêng dŭt jêr uănh nđôi nuĭh lăp tâm bri. Ban Mât uănh bri krŏng An Toàn lĕ pă 20 cán bộ kâp njrăng ta 3 ntŭk kâp gay mât bri, ƀa ƀơ uănh nđôi gay ơm nking n’gang ăp nău tih phah bri. Wa Nguyễn Phước Thiện, Trạm mât uănh bri An Toàn 1, Ban mât uănh bri krŏng An Toàn, nkuăl An Lão an gĭt, bôl lah nar rlu mô lah măng geh cán bộ kâp njrăng ta ntŭk gay uănh nđôi nuĭh, ndeh hăn lăp tâm bri, nkah ntĭnh nuĭh ƀon lan rnôk hăn tuh sŭt bri mô dơi dŏng ŭnh su:

         “Ntŭk mpôl hên lah ƀư uănh nđôi, hăn joi tĭng rơh ăp khay. Tâm rgop đah rmôt mât njrăng bri bah thôn rgot joi. Ntŭk kâp uănh hôm e njrăng n’gang, uănh nđôi ndeh sĭt hăn, bu geh rdêng moh ndơ mô tâm di luật sĭt hăn đŏng lah mô. Ta yan play ryum hăn nkoch trêng, gŭ sa đah kônh wa, ndrel đah nuĭh ƀon lan ta ntŭk hăn tât bri gay ŭanh nđôi. Tât rnôk aƀaơ, nuĭh ƀon lan ta aơ mô dŏng măy ot si gay ot phah tơm ryum”.

         Tât aƀaơ, Ban Mât uănh bri krŏng An Toàn lĕ ký ton trong tâm rgop mât njrăng bri đah ăp nuĭh tơm bri nkual kâng n’har; Ndâk ƀư ăp rmôt mât njrăng bri ta ntŭk gay nkoch trêng n’hao wât nuĭh ƀon lan mât njrăng bri. Ban mât uănh bri krŏng An Toàn lĕ jao pă mât njrăng bri an rlău 230 rnăk lah nuĭh rnoi Ba Na ta xă An Toàn đah dĭng lĕ rnoh neh 7.500 ha, tă bah aơ mât uĕh nău ƀư tơm bah nsum mpôl ƀon lan tâm trong kan mât njrăng bri.

Nkual bri ta Ban Mât uănh mât ndray bri An Toàn

         Wa Khiếu Đức Thịnh, Groi Kruanh Ban mât uănh bri krŏng An Toàn an gĭt, nkual mât ndray geh âk ntil mpa an mât njrăng kơt: gŏk jâng guh, koănh ônh, jĭl jun Trường Sơn, djăr bei... an mât njrăng rjăp. Rnôk bah năp, nău jao pă bri an nsum mpôl ƀon lan lĕ n’hao uĕh nău wât n’hanh geh nău kan bah nuĭh ƀon lan mât njrăng bri:

         “Gay mât njrăng bri krŏng ngih dak jao, Ban mât uănh dôl ndâk ƀư trong rgop tâm nchră mât uănh bri nâp nâl, mbơh UBND n’gor uănh an. Đah ăp trong gay mât uănh  hăn ta bri, ban lĕ ntơm ký ton trong tâm rgop mât uănh bri đah ăp bri nkual kâng n’har tâm lĕ rngôch neh bri nơm mât uănh. Tâm rgop đah n’gâng kan ƀon lan pah kan nkoch trêng ăp năm, ăp khay gay n’hao nău wât bah nsum mpôl tâm trong kan mât njrăng bri. An ƀư tĭng trong kan mât njrăng bri, n’hao nău geh kơt dơn nău kan bah nuĭh ƀon lan đah trong kan mât njrăng bri”.

         Wa Nguyễn Thị Tố Trân, Groi Kruanh N’gâng kan tuch tăm mât rong n’hanh hun hao ƀon lan n’gor Bình Định an gĭt, Ban Mât uănh bri nkual mât ndray bri ndrel n’gâng kan ƀon lan n’hanh nuĭh ƀon lan mât njrăng uĕh neh dơi jao mât uănh:

         “Lam n’gor knŭng geh du bri krŏng An Toàn, rnoh neh dŭt têh, tal 2 âk ntil mpa âk ntil tơm si, đah ăp ntil tơm tăm. Ban mât uănh bri krŏng An Toàn ƀư dŭt uĕh trong kan tâm rgop n’gâng kan ta ntŭk bah nkuăl tât xă kơt ƀư uĕh trong kan tâm rgop đah nsum mpôl mât njrăng bri krŏng An Toàn”.
        

                   Nuĭh rblang: Y Sưng Phê Ja