VOV4.M’nông – Uănh djăt rơh ôp nar 11/11 ta Rơh rƀŭn tal 2, Quốc hội khoá 15, wa Ksor Yin, nuĭh ƀon lan phường Đống Đa, nkual ƀon têh Pleiku, n’gor Gia Lai an lah, Kruanh N’gâng kan ntĭm nti Nguyễn Kim Sơn lĕ ơh na nê̆ ăp nău ôp nuĭh ntoh măt nkoch, tĭng nuih n’hâm uănh sŏng tâm ăp nău hôm e bah nău kan ntĭm nti. Tâm nĕ, wa Yin uănh hô ngăn tât nău rlơ̆ mô tŏng nai, yơn ăp năm nău kan ntĭm nti ăp ntŭk hôm e an ƀư tĭng n’hŭch biên chế. Wa Yin mpŏng ŭch, N’gâng kan ntĭm nti an geh nău rgop đah Chính phủ dăn đă an kơt dŏng trong ƀư êng, gay tŏng ăp n’hanh n’hao uĕh ntĭm nti tâm năm tât. Hôm wa Y Khút Niê, Groi kruanh Mpôl ntoh măt Quốc hội n’gor Dak Lak khoá 14 uănh lah: Kruanh n’gâng kan lĕ rblang ăp nău rgop nuĭh ntoh măt nkoch ta rơh rƀŭn n’hanh n’ăp ăp nkô̆ nău hôm e nkân bah rơh rƀŭn bah năp, n’hanh mpŏng Kruanh n’gâng kan ơm ndrel đah Nău kan ntĭm nti rlet rlău ăp jêr jŏt têh bah srê Covid-19.

“Tă bah nău ôp bah ăp nuĭh ntoh măt gâp an lah kruanh n’gâng kan bôl lah kruanh n’gâng kan mhe yơn gĭt nu nău dŭt n’hâm ngăch, gĭt nu nău n’hanh mkra ăp nău an uĕh. Yơn lah năm tât hôm e geh nău dŭt n’hâm têh n’hanh jêr jŏt an kruanh n’gâng kan an ƀư, dăp tay mông nar nti ngăn lah ăp mon nti gưl ngoăy aơ lah nău an dơi mĭn na nê̆, kloh rah wah lơn”.

Nŭih blang: Y Sưng Phê Ja