VOV4.M’nông – Jêh uănh djăt tât rơh ôp n’hanh ơh nău ôp, ngăn lah nkoch nău ơh bah Thủ tướng Chính phủ Phạm Minh Chính tâm ôi 12/11, nuĭh ƀon lan Trần Mạnh Việt, Kruanh Rmôt nuĭh âk năm deh ta phường 3, nkual ƀon têh Đà Lạt (Lâm Đồng) lĕ nkoch nău đăp mpăn bah nơm mpeh ăp trong mkra rdâk hao n’hanh hun hao wăng sa-rêh jêng, rlet rlău chôt srê Covid-19 ma Thủ tướng n’hanh ăp nuĭh bah Chính phủ lĕ rblang n’hanh nkoch. Yơn lah, nuĭh ƀon lan Trần Mạnh Việt mpŏng ăp trong mkra aơ an dơi ƀư du trong na nê̆ lơn, m’hâm ƀư an tâm di đah nău geh êng bah ăp ntŭk.

Cử tri Nguyễn Huỳnh, cán bộ rlu ranh ta Tổ 7, phường Thắng Lợi, nkual ƀon têh Kon Tum, n'gor Kon Tum uănh năl: Nkô̆ ôp bah ăp đại biểu Quốc hội lah nkô̆ ma ăp cử tri dôl dŭt uănh khlay da dê. Nău ơh, rblang bah 4 Bộ trưởng: Y tế; Lao động, Thương binh n'hanh Xã hội; Giáo dục n'hanh Đào tạo; Kế hoạch n'hanh Đầu tư tâm ban kơt nkô̆ ƀư kloh tay bah du đêt Bộ, n'gâng kan geh tât dŭt rgum tơm, ngăn ngăn n'hanh djăt nău rgop. Lơn lah, ta rơh ôp n'hanh ơh nău ôp rơh hop dja, nău rgop bah Thủ tướng n'hanh ăp Groi Thủ tướng hŏ ƀư kloh tay âk nkô̆ khlay, uănh năl du trong lam lĕ rngôch, jru hvi pah kan mât bôk kan, trong nkra hun hao wăng sa- rêh jêng kon nuĭh bah neh dak tâm rnôk nuh srê COVID-19. Cử tri Nguyễn Huỳnh mpơl nău, păng rnê âk nkô̆ ôp, ơh nău ôp ta rơh hop n'hanh jêh geh mât uănh bah Chính phủ:

  “Rơh dja tĭng groi nđôi nău ôp bah ăp đại biểu Quốc hội đah ăp Bộ trưởng, uănh nsum gâp saơ ăp Bộ trưởng rƀah gĭt dơi nkô̆ nău bah he. Lơn lah ăp Bộ hŏ bên di tâm nău rgâl bah nuh srê Covid-19. Nuh srê ƀư an nău rêh rlơ̆ rlơt, lĕ rngôch nău kan ƀĭt juet bah Chính phủ ân tâm di đŏng. Ntơm bah rnôk nuh srê tât aƀaơ Chính phủ hŏ geh ăp nău rgâl an tâm di. Chính phủ hŏ geh âk n'glêh an dŭt tâm di đah nău dơi geh nê. Gâp saơ du nău nsum lah Đảng, Ngih dak, Chính phủ dŭt mĭn rvê, uănh khlay n'hanh joi ăp trong gay tâm nuh srê dja ƀư dơi bar rnoh tât kan lah nkre rdâng lơh nuh srê nkre hun hao wăng sa"./.

Nŭih blang: Y Sưng Phê Ja