VOV4.M’nông: Măng 2/7, UBND n'gor Lâm Đồng ƀư rơh hop pơk sŏng dăng đah nhih pah kan dơi kan, UBND ăp nkuâl, nkual ƀon têh tâm n'gor gay an ƀư lĕ n'hâm suan trong rdêl bah nuh srê lôch geh du hê nuĭh ntưp Covid-19 ta n'gor. Nuĭh ji dơi năp ntưp đah SARS-CoV-2 lor bôk năp bah Lâm Đồng lah bu ur (46 năm deh, gŭ ta nkuâl Đạ Tẻh). Nuĭh ji n'hanh i sai, wa N.M.H, tăch play ta chợ bôk tơm Hóc Môn (nkual ƀon têh Hồ Chí Minh) ntơm bah nar 19/6 tât 25/6. Nar 26/6, wa N.M.H. rdeng i ur ma ndeh honda bah Hóc Môn sĭt jay ta thôn Phú Hòa, xã Mỹ Đức, nkuâl Đạ Tẻh, n'gor Lâm Đồng.

Tât 10h30 măng 30/6, ur păng geh mpơl ji siăk n'hanh kop duh đêt hăn tât mbơh ngăch dăng n'hâm suan ta Trạm Y tế xã Mỹ Đức. N'gâng kan ta ntŭk hŏ ndăn an gŭ rgum êng, sŏk mham uănh năl n'hanh lôch uănh năl saơ ntưp đah kaman SAR-CoV-2. Tĭng wa Tống Giang Nam, Kruanh UBND nkuâl Đạ Tẻh, ur sai wa H. rnôk ntơm bah Hóc Môn sĭt geh hăn rlău ntŭk nking kâp njrăng nuh srê bah nkuâl yơn mô mbơh ngăn ngăch dăng n'hâm suan. Lôch jêh uănh năl nuĭh geh ntưp ji, nkuâl hŏ ngăch ƀư mpă wêl thôn Phú Hoà n'hanh an ƀư ngăch ăp trong njrăng n'gang nuh srê. Aƀaơ pah kan ƀoi tĭng têl, an gŭ rgum êng, sŏk mham uănh năl ăp nuĭh mâp dăch đah nuĭh ji dôl dơi n'gor Lâm Đồng nsrôih an ƀư./.

Nuĭh rblang: Điểu Thân