VOV4.M’nông – Ta năp trong hao dăng rnoh nuĭh ntưp Covid-19 n’hanh ăp nuĭh geh bah rgâl kaman Omicron, Chính phủ Pháp lĕ mbơh kơt dŏng du âk trong njrăng n’gang dak si mhe kơt ntĭl mpông vũ trường, đă wăn bok put mbung, n’hao uănh nđôi sam ƀŭt hăn trong dak si n’hanh ngăn lah ƀư chuh an kon se bah 5-11 năm deh bah n’gul khay 12 tât. Ntoh ngơi jêh rơh rƀŭn Hội đồng Quốc phòng y tế, Thủ tướng Pháp wa Jean Castex an gĭt, kơp bah dŭt pơh aơ, lĕ rngôch vũ trường ta Pháp mbra an ntĭl mpông tâm 4 pơh gay nking n’gang rnoh nuĭh ntưp dôl hao âk tâm kon se. Wa Jean Castex kualư jă nuĭh ƀon lan n’hŭch nău ƀư tâm rgop kon nuĭh, ntrŭt đă pah kan bah ngai bâh 2-3 nar du pơh đah doanh nghiệp n’hanh đêt ngăn 3 nar đah viên chức ngih dak, dêr ăp rnôk tâm êp mô wăn bok put. Chính phủ Pháp mbra n’hao tay rnoh cảnh sát gay uănh nđôi sam ƀŭt hăn trong dak si ta ăp ntŭk rgum âk nuĭh ta bah dih.

Nŭih blang: Y Sưng Phê Ja