VOV4.M’nông - Ƀư tĭng Nghị quyết mrô 04 nar 19/8/2016 bah N’gor ủy Kon Tum khóa 15 mpeh ndâk njêng tay ăp xă dŭt jêr jŏt tâm nu nău mhe, dơi pă njêng oh nô, kơl xă dŭt jêr jŏt Văn Lem, nkuăl Đăk Tô, 5 năm bah năp mât gưl kan, nău kan way kan, Prăk nkrem mât njrăng n’hanh Hun hao bri n’gor Kon Tum lĕ geh âk nău ƀư ngăn ngên, săk rnglăy tâm nău kơl xă njêng oh nô mât uănh, njrăng n’gang n’hanh hun hao bri.

         Nar 18/6 mhe rlău, ƀư tĭng bôk nău kan bah Chi bộ Prăk nkrem mât njrăng bri n’hanh hun hao bri n’gor Kon Tum mpeh kơl, ndâk njêng xă njêng oh nô Văn Lem, nkuăl Đăk Tô, du Rmôt kan bah Tơm prăk nkrem dơi pă tâm rgop ndrel đah Đảng ủy, UBND xă ƀư rgŏ jă :Tết tăm tơm si mro mrăng nkah gĭt wa Hồ” năm 2021. Nar ƀư dơi ƀư ta Jay nhih văn hóa ƀon Măng Rương, đah tât râng âk bah nuĭh ƀon lan. Yuh Y Bé, Bí thư Chi đoàn ƀon Măng Rương, an gĭt:

         “Dŭt rhơn nar aơ geh ăp Đoàn đah thôn, xă rgum gay tăm tơm si gay bah kơi ƀon lan saơ săk rnglăy he tăm tơm si. Geh tơm si ƀon lan geh dak dŏng”.

          Ta nar ƀư rgŏ jă “Tết tăm tơm si mro mrăng nkah gĭt Wa Hồ” năm 2021, Prăk krem mât njrăng n’hanh hun hao bri n’gor Kon Tum lĕ an Đảng ủy, n’gâng kan n’hanh nuĭh ƀon lan xă Văn Lem 300 tơm n’ho 3 n’ha, ntil 2 năm gay tăm srah njok ăp trong hăn, wăr jay nhih bah ăp ƀon gay ƀư uĕh n’hanh ntŭk ntô gŭ âm kloh uĕh. Ăp cán bộ Rmôt pah kan bah tơm prăk ntĭm nuĭh ƀon lan kỹ thuật tăm, mât njrăng n’hanh chăm gay tơm n’ho hun hao uĕh. Wa A Hùng, Kruanh UBND xă Văn Lem an gĭt, nău dŭt khlay tă bah ăp nău ƀư kơt aơ, nău wât bah nuĭh ƀon lan tâm xă mpeh tăm tơm si, ƀư bri n’hanh mât njrăng bri nar lơ dơi n’hao.

         “Mro mrăng tâm khay bah năp tât aƀaơ kônh wa nuĭh ƀon lan ta xă Văn Lem dŭt n’hâm đah trong kan mât njrăng bri. Đah nău kan, mĭn nchrăp ăp ndoh ndơ, ăp nău kan geh tât mpeh trong kan mât uănh bri. ƀa bơ uănh nđôi gĭt nu nău ta neh bri mât njrăng. Lơn lah aƀaơ geh nău ntrŭnh bah n’gor, nkuăl mpeh tăm tơm si ta xă Văn Lem ri an lah aơ nău kan dŭt n’hâm khlay mpeh tăm bri ta yôk, yôk hil sât blak ta xă Văn Lem. Kônh wa nuĭh ƀon lan kơt đoàn viên druh ndăm ta ăp thôn dŭt n’hâm đah trong kan mât uănh njrăng n’gang bri kơt râng tăm bri”.

         Kơl xă tâm njêng oh nô Văn Lem tâm nău kan way kan, lah ƀư tĭng nău kơl trok nkhôm ntŭk ntô bri, ăp năm Prăk nkrem mât njrăng n’hanh Hun hao bri n’gor Kon Tum ndâk ƀư Mpôl pah kan an Kruanh Prăk nkrem ƀư kruanh mpôl ntĭm n’gâng kan ƀon lan xă uănh nđôi nău ƀư, uănh an trok prăk, dŏng prăk trok nkhôm ntŭk ntô bri; mât uănh dŏng, trok prăk dŏng an trok nkhôm ntŭk ntô bri; ndâk ƀư sam ƀŭt rhăch nău uănh pă mât uănh, mât njrăng bri an rnăk wâl, êng nuĭh, nsum mpôl ƀon lan ta thôn. Wa Hồ Thanh Hoàng, Kruanh Prăk krem mât njrăng n’hanh hun hao bri n’gor Kon Tum an gĭt, bah nău ntop kơl, kơl nău way kan bah prăk nkrem, trong kan mât uănh, mât njrăng bri ta xă njêng oh nô dơi ƀư uĕh lơn. Nuĭh ƀon lan wât nău khlay n’hanh nău uĕh ngăn bah nău mât njrăng, hun hao bri:

         “Nuĭh ƀon lan lĕ rgâl nău wâl. Bah năp đaơ nuĭh ƀon lan mât njrăng bri mô hŏ mĭn êng. Aƀaơ nuĭh ƀon lan mât njrăng bri jêng nău mĭn êng. Nuĭh ƀon lan wât nău mât njrăng bri lah nău kan khlay. Mât njrăng bri lah trong ƀư uĕh ngăn gay dơi sŏk prăk ntŭk ntô bru du trong âk ngăn. Bah prăk trok nkhôm ntŭk ntô bri lĕ rgop rgâl nău rêh bah nuĭh ƀon lan”.

         Đah nău ntĭm đŏng, mbơh ntĭm kỹ thuật bah Prăk nkrem mât njrăng n’hanh hun hao bri n’gor Kon Tum, nuĭh ƀon lan 4 thôn bah xă Văn Lem, nkuăl Đăk Tô lĕ mbơh ƀư trong ntop kơl tăm bri nkra njêng ta neh nsoih, neh yôk hil, neh sât blak đah rnoh neh 123 ha bah tơm prăk trok nkhôm ntŭk ntô bri bah xă. Trong ƀư aơ nkre kơl nuĭh ƀon lan xă Văn Lem geh tay nău kan, n’hao nău geh prăk, rgop jŭt n’hŭch ach o nkre rgop ƀư dơi nău rƀŏng tĭng tăm mhe 15.000ha bri ma Nghị quyết Đại hội Đảng bộ n’gor Kon Tum rơh tal 16 n’gluh an. Dôl rhơn lơn tay ndrel đah tăm bri, aƀaơ lĕ rngôch 4 thôn bah xă Văn Lem dơn pă mât uănh bri bah rnoh neh 5.000ha bri yor xă mât uănh. Rnoh prăk trok nkhôm ntŭk ntô bri ma ăp nsum mpôl dơi geh ăp năm kơl nuĭh ƀon lan rgâl nău rêh n’hanh mât âk nău ƀư geh nkô̆ nar lơ hun hao.

                             Nuĭh rblang: Y Sưng Phê Ja