VOV4.M’nông: Nar aơ, 28/7, Quốc hội hop n'glĕ dŭt rơh hop bôk năp, Quốc hội khóa 15. Lor rnôk n'glôch jêh rơh hop, Quốc hội uănh an dŏng nghị quyết mpeh nău ntăm n'hao Groi Thủ tướng, Bộ trưởng, ăp nuĭh kan êng ƀa ƀă bah Chính phủ; Nghị quyết uănh an ƀư Groi kruanh n'hanh ăp Ủy viên Hội đồng Quốc phòng n'hanh An ninh; uănh an dŏng Nghị quyết mpeh nău nchrăp ntăm an ƀư Thẩm phán Nhih phat dôih ƀon lan gưl têh. Quốc hội n'hơr ti uănh an dŏng Nghị quyết mpeh nău an dŏng n'glêh an sŏk dŏng ngân sách ngih dak năm 2020. Nghị quyết mpeh trong nchrăp prăk kaih 5 năm neh dak lvang năm 2021-2025. Nghị quyết mpeh trong nchrăp bôk nău kan ntuh kơl rnoh tât kan gưl neh dak n'hŭch ach o jŏ jong lvang năm 2021-2025. Nghị quyết mpeh trong nchrăp ntuh kơl bôk nău kan gưl neh dak rdâk njêng ƀon lan mhe lvang năm 2021-2025 n'hanh Nghị quyết mpeh trong nchrăp ntuh kơl jong dah găp lvang năm 2021-2025.

Dŭt mông kêng măng ntri, Quốc hội hop bah dih mông, hŏ n'hơr ti uănh an dŏng 3 Nghị quyết khlay nê lah: Nghị quyết mpeh trong nchrăp hun hao wăng sa- rêh jêng kon nuĭh 5 năm 2021-2025. Nghị quyết mpeh bôk nău kan rdâk njêng luật, pháp lệnh năm 2022, rgâl di tay bôk nău kan rdâk njêng luật, pháp lệnh năm 2021. Nghị quyết mpeh nău njêng Mpôl groi nđôi way nkô̆ bah Quốc hội năm 2022. Dŭt njrăng, năm 2022, Quốc hội mbra mĭn uănh, an nău rgop rgâl nkra Luật neh ntu./.  

Nuĭh rblang: Điểu Thân