VOV4.M'nông: Nthoi tay rơh hop tâl 2, ôi aơ, Quốc hội n'glêh an dŏng Nghị quyết mpeh trong nchrăp sŏk dŏng Ngân sách ngih dak năm 2022; ăp Nghị quyết mpeh nău way, trong kơl mha êng hun hao nkual ƀon têh Hải Phòng n'hanh ăp n'gor Nghệ An, Thanh Hóa, Thừa Thiên Huế; Nghị quyết mpeh dăp rgum dŏng neh lam dak rơh năm 2021-2030, uănh ngai tât năm 2050 n'hanh trong nchrăp dŏng neh 5 năm 2021-2025. Lôch nê Quốc hội ƀư n'glôh jêh rơh hop tâl 2, Quốc hội khóa 15. Tâm bah ri aơ nơh, đah du đêt nuĭh ŭch tĭng, Quốc hội hŏ n'hơr ti uănh an dŏng Nghị quyết mpeh trong nchrăp dăp rgum tay jâng wăng sa lvang năm 2021-2025. Tĭng nê, nău ŭch tât năm 2025, nsrôih lam dak geh nklăp 1,5 rkeh doanh nghiệp, tâm nê geh nklăp 60.000 - 70.000 doanh nghiệp dah găp n'hanh têh; rnoh âk rgop bah nkual wăng sa êng bah dih tâm GDP nklăp 55%. Nghị quyết mpeh Trong nchrăp dăp rgum tay jâng wăng sa lvang năm 2021-2025 ndơ̆ luh nău đă: dăp rgum jâng wăng sa nkre đah rgâl trong ntĭt leo hun hao tĭng trong rƀŏng đăp mpăn têh, n'hao têh rnoh săk geh, blău tam n'hanh suan dăng tâm rlong, n'hao nău dơi bên di n'hanh suan ât rdâng bah jâng wăng sa. Nghị quyết ndơ̆ luh ăp rmôt tât kan, rnoh tât kan khlay tât năm 2025./.

Nuĭh rblang: Điểu Thân