VOV4.Mnông- Ƀư tĭng tay bôk nău pah kan ta rơh rƀŭn nchră tal 2, quốc hội khóa 15, ôi nar 8/11, Quốc hội rƀŭn nchră rgum nsum ta ntŭk kan Quốc hội, tâm nchră mpeh nău geh ƀư tĭng nău nchrăp hun hao wăng sa rêh jêng năm 2021, nchrăp nău kan hun hao wăng sa rêh jêng năm 2022, mbơh tơih mpeh nău kan njrăng, rdâng nuh srê Covid-19 n’hanh nău ƀư tĭng Nghị quyết mbrô 30 mpeh rơh rƀŭn nchră tal 1, Quốc hội khóa 15. An tâm rgop nău ta nău geh ƀư tĭng nău nchrăp hun hao wăng sa rêh jêng năm 2021, dŭt âk ăp đại biểu lĕ an lah, ntuh kơl nău kan nsum lah ngoăy tâm âk nău kan khlăy ngăn gay ma ntrôl an hun hao wăng sa. Âk đại biểu an lah, gay ma ndâk nsơm wăng sa tâm nău mhe, an geh nău mât uănh bâh rmôt kan kơl an doanh nghiệp rlet rlău nău jêr jŏt, đăp mpăn pah kan jan sa.

Mpeh nău ƀư tĭng tơm prăk ngih dak năm 2021, nchrăp an tơm prăk ngih dak, ntrong kan pă tơm prăk trung ương năm 2022, ăp đại biểu lah na nê̆: tâm rnôk aơ an geh dŏng mpêt nkrem, ƀư tĭng na nê̆ nău kan dŏng mpêt nkrem, mât jăp nău kỷ luật, tơm prăk, mât na nê̆ nău dŏng, nău sŏk tơm prăk ngih dak.

Nuĭh rblang: Thị Đoắt