VOV4.M'nông: Ta năp nô nău nuh srê Covid-19 dôl tât krit nji ta nkual ƀon têh Hồ Chí Minh n'hanh du đêt n'gor mpeh bah dâng, hang rbăn nuĭh plơ̆ sĭt ƀon tơm ma ndeh honda ta trong Quốc lộ 14. Geh ăp nuĭh sĭt Tây Nguyên yơn geh ăp nuĭh sĭt miền Trung ngai ngât. Hăn rlău pe puăn rhiăng km ma ndeh honda, mô dơn nê lĕ ma rbăn km, đah dăp rduăl ndơ rdeng, geh lĕ ma oh bê̆ kon se, mô kơp măng nar n'hanh mih sial, khân păng dơn mpŏng sĭt tât ƀon đăp mpăn dơm. Ta njăr trong hăn nê, nuĭh kan hŏ dơi mpôl kan dơi kan ntop kơl ndơ ngêt sa, dak pring, mât chăm n'hâm suan, nkre sơch gay an gŭ rgum êng ăp nuĭh geh tât nuh srê Covid-19.

Ntŭk nking kâp Cai Chanh (mpeh nkuâl Dak Rlâp, n'gor Dak Nông) lah  mpông rlong bôk năp ta trong QL14 hao ăp n'gor Tây Nguyên, jêng aơ lah ntŭk mpet jâk dŭt âk nău kan yor n'hoch nuĭh plơ̆ sĭt nar lơn ma âk.

Gay bah ir lhăt bêng, ntưp rêng nuh srê, mpôl kan dơi kan hŏ ngăch tâm pă mbor trong hăn, nkre mât uănh n'hâm suan ngăch gay sơch, an gŭ rgum êng rnôk geh nău khlay. Wa Phan Nhật Thanh, Kruanh UBND nkuâl Dak Rlâp an gĭt:

“Ta ntŭk nking kâp Cai Chanh bah nkuâl Dak Rlâp, mpôl hên n'hao âk nuĭh kan, nkoch trêng, ôp uănh n'hanh mbơh ngăch dăng n'hâm suan. Tâm bah ri aơ nơh bol ma rnoh nuĭh sĭt âk yơn ăp kônh wa hôm tĭng jăp, gŭ srang ngai tĭng di nău way. N'hanh ăp oh nô tĭng ƀư nău kan ta ntŭk nking kâp Cai Chanh way tâm pleh kan nsum pah kan du nar 3 tơ̆ đŏng. Ăp gâl trong geh bưm kol mpôl hên kơi n'hao tay dân quân tự vệ, cán bộ trạm y tế n'hanh cán bộ công chức ta ăp xã kiău ma tât kơl tay”.

 Tĭng nchih rgum bah n'gâng kan dơi kan n'gor Dak Nông ntơm bah rnôk ăp n'gor mpeh bah dâng tĭng ƀư gŭ srang ngai êng nău rêh ăp nar rĭng geh rlău 5000 nuĭh ncho ndeh honda sĭt ăp n'gor Tây Nguyên. Ta Dak Nông ăp nar mhe aơ nuĭh ƀon lan bah ăp n'gor plơ̆ sĭt hao bơi 1.000 nuĭh.  

Kêng măng 29/7 mhe aơ, nklăp 900 nuĭh ta Đồng Nai hŏ plơ̆ sĭt Dak Lak ma ndeh honda. Rnoh nuĭh kan dja hŏ đăng ký đah nhih pah kan dơi kan n'gor Đồng Nai n'hanh dơn sĭt dơi rnôk hŏ lôch uănh năl ngăch mô mpơl ntưp đah COVID-19 dơm gay đăp mpăn mô kâp nsrŭng tay ta ntŭk nking kâp. Ăp mpôl kan dơi kan n'gor Đồng Nai hŏ njêng mpôl hăn groi njŭn du njăr trong hăn bơi 400km, nkre tâm pă ndeh  đông lạnh rdeng ndơ ngêt, sa rhŏ an mpôl hăn. Njăr trong hăn du măng nar ta nâm trôk mih n'hach, rnôk hăn tât Dak Lak, mpôl kan dơi kan ta n'gor hŏ nđơn wơt tay ăp nuĭh ƀon lan dja n'hanh njŭn sĭt ta Nhih nti THPT dân tộc nội trú Nơ Trang Lơng, nkual ƀon têh Buôn Ma Thuột gay đăp mpăn ƀư ăp ntil si ƀŭt khlay.

Pơh bah năp nơh, ta njăr trong Quốc lộ 14, geh mbro ăp mpôl nuĭh bah nkual ƀon têh Hồ Chí Minh n'hanh du đêt n'gor mpeh bah dâng plơ̆ sĭt. Geh ăp nuĭh hao Tây Nguyên, n'hanh geh âk nuĭh sĭt miền Trung ngai ngât. Lôch hăn rlău n'gor Dak Nông, Dak Lak, khân păng hôm mât ntŭk nking kâp njrăng nuh srê Covid-19 ta ntung 110, nkuâl Chư Pưh, n'gor Gia Lai. Ta aơ, wa Hồ Văn Thanh dôl ndrel nuĭh băl ncho ndeh honda sĭt bah nkual ƀon têh Hồ Chí Minh sĭt Kon Tum an gĭt:

“Gâp ta n'gor êng sĭt, cán bộ ta aơ pah kan dŭt rah rơch, an mpôl hên xăng, dak ngêt, mì tôm, bánh mì. Gâp dŭt lah uĕh nuih n'hâm bah n'gor Gia Lai”

Tĭng Trung tá Nguyễn Minh Tuấn, Kruanh Rmôt Cảnh sát giao thông mbrô 1, Công an n'gor Gia Lai, tâm ăp nar rlău aơ, geh dŭt âk nuĭh n'hanh ndeh rklư plơ̆ sĭt bah nkual nuh srê. Lôch rnôk mbơh ngăch dăng n'hâm suan, nuĭh ƀon lan dơi dăp rgum ntŭk manh rlu rlău, geh ndơ ngêt, ndơ sa kơl an dơm. Lôch nê, mpôl kan dơi kan ntĭm nti hăn plơ̆ sĭt ƀon tơm dơh soih.

“Aƀaơ, kơt ăp nar âk ri kônh wa ta ăp nkual geh tơm nuh srê plơ̆ sĭt ri mpôl hên leo njŭn an gŭ rgum êng ntơm bah 500 tât 600 nuĭh. Đah kônh wa ta ăp n'gor êng ƀa ƀă hăn rlău n'gor Gia Lai nklăp 600 nuĭh đŏng”.

Njăr trong hăn plơ̆ sĭt jay ta trong Quốc lộ 14, rnôk hăn lĕ n'har n'gor Gia Lai, ăp nuĭh kan mât tay ntŭk nking kâp njrăng nuh srê Sao Mai - mpông rlong mpeh bah dâng lăp tâm n'gor Kon Tum. Bol mô mpet jâk kơt mpeh bôk tơm Cai Chanh bah n'gor Dak Nông, yơn rĭng ăp nar geh ntơm bah 250 tât 350 nuĭh hăn rlău ntŭk nking kâp njrăng. Ta aơ, ăp mpôl kan dơi kan gŭ kâp njrăng ndăng măng nar gay wơt nuĭh ƀon lan plơ̆ sĭt bah nkual nuh srê. Lôch rnôk dơi leo an ntŭk gŭ rlu rlău sĭt dăng tay n'hâm suan, nuĭh ƀon lan dơi kơl dak ngêt, piăng hôp, xôi, bánh mì n'hanh dơi troch bêng xăng lor rnôk hăn tay trong sĭt. Nô Lê Hương, jay ta nkuâl Phú Vang, n'gor Thừa Thiên- Huế an gĭt:

          “Gâp sĭt bah Phú Giáo, n'gor Bình Dương. Sĭt tât Bình Phước lôch Bình Phước hăn tât Dak Nông. Dak Nông hăn tât Gia Lai. Gia Lai kơl xăng, ndơ sa jăch n'hanh dak ngêt rgum sĭt ta aơ. Cảnh sát giao thông Kon Tum ta aơ kơl gâp xăng, ndơ sa n'hanh dak ngêt".

          Ta năp ăp jêr jŏt, ŏ r'ah n'hanh bah ăp công nhân nuĭh kan, nuĭh hăn joi êng nău kan bah dih ta njêng trong plơ̆ sĭt bah nkual nuh srê COVID-19 mpeh bah dâng plơ̆ sĭt ƀon tơm, ndrel đah n'gâng kan ăp n'gor tâm nkual Tây Nguyên, âk mpôl, ăp nuĭh ta ăp n'gor ŭch kơl êng ăp nar hang rhiăng nklâm ndơ sa dơm tâm ban kơt du đêt ndơ dŏng sa khlay kơl trong plơ̆ sĭt bah nuĭh kan dơi dơh soih n'hanh đăp mpăn lơn./.

Nuĭh rblang: Điểu Thân