VOV4.M’nông – Ôi 4/6 ta Hà Nội, Groi Thủ tướng Chính phủ Lê Văn Thành-Kruanh Ban ntĭm rđău Trung ương mpeh njrăng n’gang trôk nar lơh ƀư tơm rƀŭn nchră pơk sŏng dăng lam dak mpeh njrăng n’gang trôk nar lơh n’hanh joi kơl nău rmanh năm 2021 ta ntŭk ƀoh ta Ngih pah kan Chính phủ. Rƀŭn nchră rgum uănh lah lĕ rngôch trong kan njrăng n’gang trôk nar lơh năm 2020, tĭng ăp săk rnglăy dơi geh, ăp nău hôm e, nău rhoăt tay bah n’hêl na nê̆ trong kan ntĭm rđău, ƀĭt joet rƀŭn nchră n’gluh an nău kan khlay đah trong kan njrăng n’gang trôk nar năm 2021. Tĭng nĕ, mbơh ƀư dŭt n’hâm ăp trong mkra tâm ban bah njrăng n’gang tât rdâng n’hanh mkra khuch khat gay n’hŭch đêt ngăn khuch khat mpeh nuĭh n’hanh drăp ndơ tĭng nuih n’hâm, ndâk njêng nsum mpôl đăp mpăn ta năp trôk nar. Năm 2020, trôk nar ta dak he geh rŭn ndal n’hanh dŭt hô. Lam dak lĕ kơp dơn 16 tâm dĭng lĕ 22 ntil trôk nar lơh. Trôk nar lơh lĕ ƀư 257 nuĭh khĭt n’hanh roh đah dĭng lĕ khuch khat đah prăk kaih bơi 40 rbăn rmen prăk.

Nŭih rblang: Y Sưng Phê Ja