VOV4.M’nông – Jêh 2 nar pah kan, nar 14/7, rơh rƀŭn tal 58 bah Ủy ban Thường vụ Quốc hội rƀŭn n’glôch jêh. Kruanh Quốc hội Vương Đình Huệ mĭn lah: tât rnôk aơ, lĕ rngôch nkô̆ nău nchrăp an rơh rƀun bôk năp, Quốc hội khóa 15 lĕ jêh n’hanh nchrăp an nar ntơm ƀư 20/7 êp tât. Kruanh Quốc hội Vương Đình Huệ uănh lah, rơh rƀŭn lĕ geh nău tâm ban ŭch, tâm ban ŭch dŭt âk, ngăn lah đah ăp trong nchrăp 5 năm mpeh hun hao wăng sa rêh jêng, mpeh ntuh kơl nsum, mpeh prăk kaih ngih dak, mpeh trong nchrăp manh trok rnon nsum, ntuh kơl đêt năm 5 năm lvang 2021-2026. Kơt ăp bôk nău kan rƀŏng tĭng lam dak mpeh ndâk njêng ƀon lan mhe n’hanh n’hŭch ach o nâp nâl lvang năm 2021-2025. Mpeh nchrăp an rơh rƀŭn bôk năp bah Quốc hội, Kruanh Quốc hội Vương Đình Huệ lah, ăp ngih pah kan ngih dak tâm rgop rjăp đah N’gâng kan dak si, ăp ngih pah kan nkual ƀon têh Hà Nội nchrăp ăp trong nchrăp, ăp trong ƀư rdâng tâm di đah nu nău jêr jŏt bah srê Covid-19 gay tŏng ăp đăp mpăn an rơh rƀŭn bôk năp, Quốc hội khóa 15.

Nuĭh rblang: Y Sưng Phê Ja