VOV4.M’nông: Nar 1-7, ăp ntŭk kan dak si ta Mátxcơva (Nga) ntơm chuh vaccine njrăng n'gang Covid-19 n'glai nkah tay tâm rnôk mpôl kruanh Nga dôl nsrôih kân bah ntoh luh nuh srê mhe tă bah kaman njêng săk mhe Delta. Bộ Y tế Nga hŏ ndơ̆ luh trong ntĭm nti mhe an bôk nău kan chuh n'gang lam dak, njrăng đă ăp ntŭk kan dak si ntơm chuh nkah tay an ăp nuĭh hŏ tă chuh đah aƀaơ 6 khay mô lah ơm jŏ lơn. Ndrĭ, Nga lah ngoăy tâm ăp dak lor bôk năp bah lam ntŭr neh ntơm chuh n'glai nkah tay. Tĭng Bộ Y tế Nga, trong kan dja lah trong nkra jăch ndăn tă bah rnoh âk nuĭh ntưp ta Nga dôl hao âk ngăch n'hanh rnoh ngăch chuh n'gang hôm đêt. Nar 1/7, Nga năl geh 672 nuĭh khĭt tă bah Covid-19, dŭt âk lah kơp tĭng nar ntơm bah rnôk nuh srê ntoh luh. Kơp ntơm bah rnôk an ƀư bôk nău kan chuh n'gang rnôk khay 1, tât aƀaơ Nga mhe chuh an nklăp 16% rnoh nuĭh dơm./.

Nuĭh rblang: Điểu Thân