VOV4.M'nông: Nar 12/11, Bộ Lao động - Thương binh n'hanh Xã hội ƀư tơm, kan nsum đah ăp nhih pah kan Liên hợp quốc ta Việt Nam ƀư rgŏ jă  Khay kan an tâm ban bu ur bu klô n'hanh njrăng, n'gang rdâng lơh đah nău tâm lah tâm janh nsing tâm ban bu ur bu klô năm 2021 ntơm bah nar 15/11 tât nar 15/12 đah nkô̆ “Đăp mpăn rêh jêng kon nuĭh, n'hao nău dơi kan n'hanh nta trong dơh an bu ur n'hanh kon se bu ur gay tĭng ƀư tâm ban bu ur bu klô n'hanh jut bah tâm lah tâm janh đah bu ur n'hanh kon se bu ur". Nău an ƀư khay kan tâm ban bu ur bu klô n'hanh njrăng, n'gang, rdâng lơh đah tâm lah tâm janh nsing tâm ban bu ur bu klô ntơm bah năm 2016 tât aƀaơ hŏ njêng luh ăp ring tam uĕh, wăch rgum nău tât râng, uănh khlay, nsum ti lăp kan bah lam rêh jêng kon nuĭh, rgop rhuăt glêh tâm ƀah bu ur bu klô tâm lĕ rngôch ăp trong kan. Rnoh hun hao ta rnoh âk, ndơ̆ Việt Nam dâk tâl 65 tâm lĕ rngôch rnoh 162 dak n'hanh gŭ tâm rmôt dŭt âk tâm 5 rmôt lam ntŭr neh. Lơn lah, nău an dŏng bôk nău kan nkoch trêng mpeh tâm ban bu ur bu klô tât năm 2030 gay mpơl nău uănh khlay mha êng bah Chính phủ đah pah kan nkoch trêng mpeh tâm ban bu ur bu klô. Rgŏ jă khay kan năm 2021 kuăl jă lĕ rngôch ăp ding geh tât n'hanh nuĭh ƀon lan tĭng n'hanh an ƀư ăp nău kan ngăn ngăn gay ntrŭt ntrôl tâm ban bu ur bu klô n'hanh trong njrăng n'gang, rdâng lơh ăp ntil tâm mưch rmot n'hanh tâm lah tâm janh nsing tâm ban bu ur bu klô./.

Nuĭh rblang: Điểu Thân