VOV4.Mnông- Yor geh mih têh jŏ nar, ta trong Trường Sơn Đông ntŭk hăn let n’gor Kon Plông, n’gor Kon Tum lĕ geh rluh neh âk. Ndrel đah mbơh nău kan nkra nsơm tay, tâm nar 9/11, mpôl kan têh lĕ geh an rlu bât ndeh hăn nsong ta trong aơ gay ma mât đăp mpăn. Ntuđk rluh neh ta trong Trường Sơn, ntŭk hăn let nkuăl Kon Plông, n’gor Kon Tum geh ta km 176+300 ngai đah xã Ngọc Tem klâp ma 1km.

Ntŭk rluh trong ƀư mô dơi ndeh klư hăn nsong

Rluh neh bơi lĕ măt trong hăn

Ta ntŭk aơ, trong geh rluh jru 2m jêng rluh hvi 2/3 măt trong n’hanh khuch 2 plơp bê tông xi măng măt trong đah nău jong 10m mbra geh rlâm tâm nglah trong. Ntŭk kan mât uănh trong hăn III.4 lĕ ntĭm đă ntŭk kan mât uănh trong hăn rgum nuĭh kan ndeh klư máy mok pơk du trong êng mpeh ta luy dương. Ta năp nĕ, chi cục mât uănh trong neh II.4 lĕ dăn đă đah ăp ntŭk kan têh ta n’gor Kon Tum mbơh tơih lam hvi tât ăp ntŭk kan ntoh rup ntoh ngơi mpeh nău tât khuch trong aơ gay ma ƀon lan gĭt n’hanh mô hăn nsong ta trong Trường Sơn Đông, ntŭk hăn let n’gor Kon Tum tât rnôk lôch nkra tay.

Nuĭh rblang: Thị Đoắt