VOV4.M’nông: Kêng măng 2/6, ta ntŭk kan Chính phủ, ƀư tơm nar rƀŭn trực tuyến đah Rnâng kan rđau nau kan neh dak mpeh nau njrăng rdâng srê Covid-19 đah N’gâng kan dak si ndrel Viện Pasteur nkuăl ƀon têh Hồ Chí Minh, Groi Thủ tướng Vũ Đức Đam, Kruanh Rnâng kan rđau nau kan neh dak đă nkuăl ƀon têh Hồ Chí Minh lŏ xét nghiệm nau kơp uănh tâm ƀon lan, sŏk mham xét nghiệm nau tât tâm ăp nkuăl mra geh khuch, mô lah dŏng robot kuăl điện êng gay ma ôp khâl n’hâm soan gay ƀon lan mbơh nau mpeh dak si, tă bah nê tât tâm ngih sŏk mham uănh năl ăp nŭih geh nau tât mpơl bah nau ji ntưp. Kơp dơn nau nchrăp ueh tâm nau kan njrăng rdâng srê tâm nkuăl ƀon têh Hồ Chí Minh, Groi thủ tướng Vũ Đức Đam đă Rnâng kan rđau kan nkuăl ƀon têh ƀư uănh xét nghiệm nau nkân njrăng gay ma geh năl ntŭk geh srê geh tâm ƀon lan. Groi Thủ tướng Vũ Đức Đam nkah nkuăl ƀon têh Hồ Chí Minh, rnôk saơ geh srê ntoh tay tâm ntŭk kan công nghiệp, kan ƀư nchueng rdâng, nkhah dak si ƀư ân rjăp, khoa học, der tâm ntưp âk./.

Nŭih rblang: H’Thi