VOV4.M’nông – Ăp nar bah năp, nkaul ƀon têh Buôn Ma Thuột, n’gor Dak Lak na nao kơp dơn âk nuĭh ntưp Covid-19, dôl uănh, rnoh nuĭh saơ tâm ntŭk gŭ rêh geh bơi n’gul tâm dĭng lĕ rnoh nuĭh ntưp. N’hŭch âk an ăp nkual nkhah rgum n’hanh ăp Ngih dak si săm nuĭh ji Covid-19, nkual ƀon têh Buôn Ma Thuột lĕ ƀư nkhah êng F1 ta jay n’hanh dôl nchrăp ăp trong săm F0 ta jay. Knŭng kơp êng bah bôk khay 11 tât aƀaơ, nkual ƀon têh Buôn Ma Thuột lĕ kơp dơn 500 nuĭh ji Covid-19, tâm nĕ geh 200 nuĭh dơi saơ tâm ntŭk gŭ rêh.

Nkual ƀon têh Buôn Ma Thuột dôl ƀư tĭng nkhah êng F1 ta jay

Tâm nar 8/11 nkual ƀon têh Buôn Ma Thuột kơp dơn rnoh nuĭh ntưp âk ngăn đah 123 nuĭh, tâm nĕ geh 81 nuĭh ntŭk gŭ rêh, n’hao dĭng lĕ nuĭh ji Covid-19 ta nkual ƀon têh Buôn Ma Thuột 1359 nuĭh. Ta năp nău hao đah rnoh nuĭh ji, nkual ƀon têh Buôn Ma Thuột lĕ an trong nchrăp ƀư nkhah êng ta jay ăp F1 geh tŏng ăp ndơ nkhah êng tĭng nău ntrŭnh bah N’gâng kan dak si. Aƀaơ lĕ geh rlău 50 nuĭh F1 dôl ƀư nkhah êng ta jay. Tâm nar 8/11, kơp nsum lam n’gor Dak Lak kơp dơn 287 nuĭh ntưp Covid-19, tâm nĕ geh 127 nuĭh ta ntŭk gŭ rêh. Aơ lah nar geh rnoh nuĭh ntưp âk ngăn bah sa ơm tât aƀaơ.

Nuĭh rblang: Y Sưng Phê Ja