VOV4.M’nông - Ta Hà Nội dôl ƀư rơh rƀŭn bôk năp, Quốc hội khóa 15. Rơh rƀŭn aơ geh nău ƀư dŭt khlay, n’gluh an n’gâng tơm an nău kan bah Quốc hội khóa 15 rnôk ntơm săch, uănh an nuĭh kan ăp gưl nău rđău kan bah ăp ngih pah kan Ngih dak n’hanh ntrŭnh ăp trong nchrăp wăng sa, rêh jêng, prăk kaih, tơm prăk, ntuh kơl nsum, bôk nău kan rƀŏng tĭng lam dak, gay geh trong an nău mbơh ƀư tâm 5 năm tât.

                   Pah kan rdâk ƀư, nuĭh kan gưl prêh bah Ngih dak lah nkô̆ nău khlay bah rơh rƀŭn bôk năp tâm năm kan Quốc hội khóa 15. Tĭng nău ntrŭnh bah Hiến pháp năm 2013, jêh rnôk dơi Quốc hội săch, Kruanh Quốc hội, Kruanh dak, Thủ tướng Chính phủ, Chánh án Ngih phat dôih ƀon lan gưl prêh mbra ƀư dơn kan bah năp Quốc hội. Dĭng lĕ geh 50 gưl kruanh rđău kan bah ăp ngih pah kan Ngih dak dơi Quốc hội ntơm săch, uănh an ta rơh rƀŭn aơ. Êng Chính phủ, tâm rơh rƀŭn aơ uănh tay 4 Groi Thủ tướng. Kruanh Ban pah kan ntoh măt Quốc hội Nguyễn Thị Thanh an gĭt, ăp gưl săk dơi mbơh Ban Chấp hành Trung ương n’hanh Bộ Chính trị lĕ mbơh an ăp Bôk nău rgop an tâm nchră geh tât gưl săk bah Quốc hội n’hanh Bôk nău rgop an tâm nchră dăp n’hao Chính phủ:

Ntơm ƀư rơh rƀŭn bôk năp, Quốc hội khóa 15

         “Ndâk ƀư n’gâng kan, dăp n’hao bah Chính phủ mbra uănh tay 27 gưl săch geh: Thủ tướng, 4 groi Thủ tướng n’hanh 18 kruanh n’gâng kan, 4 groi kruanh nchră nău ngih pah kan tâm ban bộ. Bôk nău rgop an tâm nchră dơi nkah, uănh tay na nê̆ tĭng nkô̆ nău uănh lah n’glôn jêh  năm kan bah Chính phủ lvang 2016-2021 n’hanh tĭng nkô̆ nău uănh nkah lĕ rngôch mpeh trong kan cán bộ”.

         Nău uănh tay n’gâng kan ƀĭt joet Ngih dak lah mô dơi mbrơi. Nău aơ joi đă lĕ đah nău kan bah ăp nuĭh ntoh măt tĭng nkô̆ nău rơh rƀŭn, lơn lah tâm nău săch, uănh an, uănh dăp tay 50 gưl săk kruanh rđău kan bah ăp ngih pah kan ngih dak. Ăp nuĭh ntoh măt wa Phạm Văn Hòa, mpôl Đồng Tháp an gĭt:

         “Nău kan bah ăp nuĭh ntoh măt an rgum, nsrôih gay ƀư nău nsing nơm, dơn săch bah nuĭh ƀon lan tâm rơh rƀŭn. Bôk năp an săch luh geh 50 nuĭh n’gâng tơm. Kruanh Quốc hội, ăp Groi kruanh, ăp nuĭh; Kruanh dak, Groi Kruanh dak; Chính phủ, Groi Thủ tướng; ăp nuĭh Chính phủ; Viện kiểm sát; Ngih phat dôih; Tổng kiểm toán... Gâp an aơ lah nău kan dŭt khlay”.

         Ndrel đah trong kan nuĭh kan, Quốc hội mbra ntrŭnh ăp nău mpeh wăng sa-rêh jêng, prăk kaih, tơm prăk ngih dak 6 khay bah năp n’hanh nchrŏng trong, mkra an 6 khay dŭt năm, lơn lah Bôk nău kan lĕ năm kan khóa 15. Nĕ lah bôk nău kan mpeh hun hao wăng sa-rêh jêng, mpeh ntuh kơl, mpeh prăk kaih tơm prăk, lơn lah rnon nsum n’hanh ăp nău geh tât nău kan prăk kaih lvang 2021-2025. Aơ lah ăp nău khlay, ƀư nkô̆ nău an ƀư tĭng “nău rƀŏng nsum” nkre nchăng n’gang srê nkre hun hao wăng sa rêh jêng, mpeh tâm nău dơi mkra bah Quốc hội tĭng luật ntrŭnh. Tổng thư ký, Chủ nhiệm văn phòng Quốc hội Bùi Văn Cường mĭn lah:

         “Lah Quốc hội mô ntrŭnh bôk nău kan 5 năm mpeh wăng sa rêh jêng mbra dŭt jêr jŏt an Chính phủ tâm nău mbơh ƀư ƀĭt joet na nê̆. Aơ lah trong ƀư Nghị quyết Đại hội 13 bah Đảng. Quốc hội lah ngih pah kan Ngih dak têh ngăn, an mbơh an ăp nău ntrŭnh mpeh hun hao wăng sa-rêh jêng. Lah Quốc hội mbrơi mbơh ri mpeh ntuh kơl nsum mbra dŭt jêr jŏt, lơ mbrơi ri lơ ƀư an nău kan ntrôl hun hao mbrơi lơn”.

Kruanh Quốc hội Vương Đình Huệ ntoh ngơi ntơm rơh rƀŭn

         Bôl dôl khuch bah chôt srê Covid-19 đah nu nău jêr jŏt, jêr njrăng, yơn tâm trong nchrăp hun hao wăng sa hao jêng tay. Chính phủ tâm ban ŭch Quốc hội mô hŏ nkra rgâl nău rƀŏng, rnoh an hun hao wăng sa-rêh jêng năm 2021 lĕ n’gluh an GDP hao jêng bah 6-6,5%. Groi Chủ nhiệm Ủy ban Kinh tế bah Quốc hội Nguyễn Minh Sơn rblang:

         “Mô nkra rgâl an ƀư mpeh hao jêng. Nkô̆ nău hôm e tĭng Nghị quyết 124 lĕ jao an Chính phủ. Ta rnôk nĕ Quốc hội uănh lah dŭt n’hâm lĕ rngôch n’hanh rlăp lor ăp ntil nău khuch bah srê Covid tât jâng wăng sa n’hanh ndơ̆ an gay nsrôih âk ngăn tâm năm tât gay dơi geh nău rƀŏng, săk rnglăy n’gluh an”.

         Gay đăp mpăn lôch uĕh rơh rƀŭn bôk năp, ăp ngih pah kan bah Quốc hội, Chính phủ, Quốc hội. Tâm nu nău chôt srê Covid-19 geh jêr jŏt, Quốc hội lĕ mbơh N’gâng kan Chính trị n’hanh rƀŭn rgum ta jrô rƀŭn Diên Hồng đah dŭt n’hâm ntêm nkre mông nar n’hanh geh săk rnglăy âk ngăn, đăp mpăn ngăn. Bôk nău rơh rƀŭn lĕ dơi rhoăt đêt 5 nar nkôp đah nău nchrăp, pah kan n’ăp nar rlu. Ăp nuĭh ntoh măt Quốc hội tât bah 19 n’gor geh srê lĕ dơi ndơ̆ wơt êng, gŭ jay năch êng n’hanh gŭ rƀŭn êng du nkual tâm jrô rƀŭn Diên Hồng. Tổng thư ký, Chủ nhiệm văn phòng Quốc hội Bùi Văn Cường an gĭt tay:

“Mpeh nău way, nuĭh ta ăp ntŭk ƀư tĭng gŭ tâm srang kon nuĭh tĭng ntĭm đă 16 rnôk sĭt Hà Nội, lah nuĭh ƀon lan ngăn ri an nkhah êng, yơn Thủ tướng Chính phủ lĕ ntrŭnh đah ăp nuĭh ntoh măt Quốc hội lĕ uănh năl 3 tơ̆ mô ntưp, lĕ chuh vaccine ri dơi hăn râng ngăn. Yơn lah an ƀư tĭng rjăp ăp nău ntrŭnh mpeh njrăng, n’gang srê Covid-19. Aƀaơ mpôl hên geh trong ƀư nchrăp lor, lah saơ nuĭh ntoh măt geh nău saơ êng ri jrô rƀŭn êng gay nkhah êng, yơn hôm e râng ăp nkô̆ nău rơh rƀŭn n’hanh nklăch phiếu nâm ơm”.

         Nuĭh ƀon lan lam dak dôl uănh nđôi n’hanh nsing nơm lah, rơh rƀŭn bôk năp, Quốc hội khóa 15 ƀư đăp mpăn, lôch uĕh. Aơ lah rơh rƀŭn dŭt khlay, lah ƀư uĕh n’hanh răp jăp mbra rgop ntrôl hun hao wăng sa-rêh jêng neh dak, ngăn lah ƀư tĭng “nău rƀŏng kan nsum”, nkre hun hao wăng sa, nkre njrăng n’gang srê Covid-19 tam./.

                   Nuĭh rblang: Y Sưng Phê Ja