VOV4.M’nông - Dơn hôm bar pe nar tay đŏng dơm, rlău 69 rkeh nuĭh ƀon lan lam dak mbra tĭng ƀư nău dơi chính trị tơm n’hanh dŭt têh khlay bah nuĭh ƀon an: hăn nklăch phiếu na nê̆ sơch nuĭh dŭt ntoh lư râng Quốc hội n’hanh Hội đồng nhân dân ăp gưl. Tă khuch bah nuh srê Covid-19, tât aƀaơ ăp n’gor hŏ nchrăp ăp trong ƀư nklăch phiếu tâm rnôk njrăng, n’gang nuh srê da dê. Nău ŭch lah lĕ rngôch ăp cử tri dơi râng nar “Rgum neh dak” n’hanh tĭng ƀư nău dơi săch.

          89 ntŭk nklăch phiếu ta lam quận Cầu Giấy, nkual ƀon têh Hà Nội tât rnôk aơ dơi nchrăp uĕh da dê, tŏng ăp đăp mpăn njrăng n’gang nuh srê. Ta ăp ntŭk săch geh ƀư trong hăn, ndring kloh aih n’hanh geh ntĭm na nê̆ an nuĭh ƀon lan hăn nklăch phiếu, tŏng ăp tâm ƀah rnôk sŏk phiếu, nchih phiếu n’hanh nklăch phiếu; wăn bok put mbung, ƀư rao ty, rao kaman lor n’hanh jêh nklăch phiếu.... Wa Trần Thị Phương Hoa, Bí thư quận ủy, Kruanh Ban ntĭm rđau săch quận Cầu Giấy an gĭt: rlău ma tŏng ăp nău ntrŭnh đăp mpăn njrăng n’gang srê Covid-19 tâm rnôk nklăch phiếu, quận nchrăp na nê̆ đah tĭng trong ƀư lah geh srê.

         “Trong ƀư gay njrăng n’gang srê tâm nău săch lĕ ntrôl tay du njoat. Aƀaơ ăp nkual săch geh jrô nkhah êng. Rmôt săch dơi tiăr nti, rlău ma tiăr nti nghiệp vụ ri dak si geh nău kan tiărr nti an ăp nuĭh tâm rmôt săch geh tay nău blău tâm trong kan njrăng n’gang srê gay ntĭm nuĭh ƀon lan rnôk tât săch tŏng ăp đăp mpăn njrăng n’gang srê.

                   Lĕ rngôch ăp quận bah nkual ƀon têh Hà Nội lĕ geh ăp trong mkra njrăng n’gang srê ta ntŭk săch n’hanh geh trong ƀư êng đah ntŭk nkhah êng, nchoeng n’gang. Ủy ban săch nkual ƀon têh Hà Nội lĕ dăn đă Hội đồng săch ngih dak mpeh ăp trong ƀư êng rmôt săch ta ăp ntŭk nkhah êng dak si.

         Hôm ta nkual ƀon têh Hồ Chí Minh, Ủy ban săch nkual ƀon têh đă dăp an ntŭk gŭ tŏng ăp nău đă tâm ƀah, n’hŭch rgum âk nuĭh; pă nuĭh râng mô rlău 50% ntŭk gŭ bah jrô rƀŭn ƀư. Dôl uănh, ta Bắc Giang, ntŭk dôl ntoh srê Covid-19 âk ngăn lam dak aƀaơ nchrăp mbra mô ƀư âk nuĭh tâm nar săch; tâm pă đêt nuĭh ƀon lan jêng âk rơh gay nklăch phiếu tĭng mông, dêr rgum âk nuĭh... Wa Ngô Sách Thực, Groi Kruanh Ủy ban Trung ương MTTQ Việt Nam an lah: Tâm rnôk aơ ăp ntŭk ƀư săch tâm nău ntoh srê Covid-19, ri nău năl, ƀư, prăp săk nuĭh ƀon lan ta ăp nkual nkhah êng kon nuĭh, nkual săm ji rgum.... an tŏng ăp nău dơi gay nuĭh ƀon lan tâm nkual aơ ƀư tĭng nău dơi săch bah nơm:

                   “Mpôl hên saơ rnôk geh srê mô lah rnôk nu nău ndal an geh nău nchrăp na nê̆, gay ăp nkual nkhah êng an ƀư thùng phiếu hăn ăp ntŭk. Ndrel du rmôt nklăch phiếu, du nkual nklăch phiếu ăp sam ƀŭt nchih săk nuĭh ƀon lan ăp ntŭk ri nău sŏk thùng phiếu hăn ăp ntŭk m’hâm ƀư tŏng ăp nkre nking n’gang srê n’hanh ƀư tĭng nău dơi nuĭh ƀon lan bah ăp nkual nkhah êng”.

         Ta Tây Nguyên mông nar săch lĕ khuh n’gôr. Nuĭh ƀon lan kơt H’ Sinh Bkrông, sinh viên năm tal 2, Đại học Tây Nguyên, n’gor Dak Lak, an gĭt, aơ lah rơh bôk năp râng nar rgum săch jêng H’Sinh dŭt rhơn, kâp nar dơi djôt ta ty n’ha phiếu, ƀư tĭng nău dơi n’hanh nău kan bah nơm. H’Sinh nkoch:

         “Aơ lah rơh bôk năp oh nchrăp hăn nklăch phiếu, jêng oh dŭt rhơn ƀư tĭng nău dơi nuĭh ƀon lan bah nơm. Êp tât rnôk nklăch phiếu oh mbra săch ăp nuĭh gĭt blău, rgop ntrôl hun hao wăng sa, rêh jêng ta ntŭk”.

         N’gor đoàn Dak Lak lĕ ƀư âk nău kan mbah rhơn ta ăp nkuăl, nkual ƀon têh đah tât râng bah rbăn đoàn viên, druh ndăm tâm n’gor. Tĭng ƀư nău kan ŭch êng ta ăp ntŭk săch kơt: ntop kơl rnă njrăng, đăp mpăn răk rao ntŭk ntô săch, trong kan njrăng n’gang srê Covid-19; ƀư Nar rgum nŭih ƀon lan druh ndăm; rƀŭn nchră “Nuĭh ƀon lan druh ndăm đah rơh săch nuĭh ntoh măt Quốc hội khóa 15 n’hanh nuĭh ntoh măt HĐND ăp gưl năm kan 2021-2026”.

         Gay tŏng ăp đăp mpăn an nuĭh ƀon lan râng “Nar rgum bri dak”, Ủy ban săch ngih dak lĕ an na nao ăp nău ntĭnh mpeh săch. Mhe aơ ngăn, Hội đồng săch ngih dak lah tay tâm rnôk ƀư săch an tĭng tâm nău têh hvi, rnoh nuĭh ƀon lan tatĭng nkual nklăch phiếu n’hanh đă njrăng n’gang srê Covid-19 ta ntŭk. Đah nuĭh ƀon lan lah nuĭh ntưp Covid-19, Chủ nhiệm Ủy ban Pháp luật bah Quốc hội Hoàng Thanh Tùng an gĭt:

         “Hiến pháp ntrŭnh ăp nuĭh ƀon lan dơi săch an dơi nchih săk tâm sam ƀŭt nuĭh ƀon lan ƀư tĭng dơi săch. Jêng nuĭh ƀon lan lĕ saơ ntưp nkhah êng ta jay mô lah rgum ri ngih dak hôm e an tŏng ăp nuĭh nĕ dơi nchih săk tâm săm nuĭh ƀon lan. Aơ lah nău kan bah Ủy ban nhân dân gưl xă ntŭk nuĭh nĕ gŭ mô lah ntŭk nkhah êng tŏng ăp trong mkra dơi ƀư tĭng nău dơi săch”.

         Aƀaơ ăp ntŭk kan, ƀơn lan ta lam dak dôl nchrăp tay ăp trong ƀư, nkoch trêng tât rnăk wâl, tĭng nuĭh ƀon lan tŏng ăp nău đă njrăng n’gang srê rnôk hăn nklăch phiếu n’hanh trong ƀư săch tâm nău geh srê. Nău rƀŏng khkay ngăn dơi rƀŏng tât lah lĕ rngôch ăp nuĭh ƀon lan dôl ta nkual nkhah êng, săm Covid-19, y-nai dak si, ăp rmôt dôl pah kan.... dơi ƀư tĭng nău săch da dê. Lĕ rngôch ăp nău ƀư an ƀư di pháp luật, đăp mpăn lĕ rngôch tâm nău dŭt n’hâm jêr jŏt bah srê Covid-19./.

Nuĭh răk rblang: Y Sưng Phê Ja