VOV4.M’nông: Thủ đô Đa-mát bah Syria ƀư tơm nar rƀŭn mpeh Ŭnh nar ăp dak A-rập tâm năm 2024. Aơ lah nau mbơh geh N’gâng kan tơm pring ndrel Khoáng sản bah Syria mbơh tâm lơ 9/12. Tĭng nau mbơh, jêh rơh rƀŭn trực tuyến đah ăp Kruanh n’gâng kan tơm pring geh ƀư ân ăp dak tăch luh pring A-rập (OPEC) mhe geh ta Cô-oét, ăp dak kan nsum mra tâm ban nau săch dak Syria lah ntŭk gay ƀư tơm ân nar tâm nchră tâm năm 2024, nê lah du năm jêh rnôk Ca-ta ƀư nau kan khlay aơ tâm năm 2023. Ndrel ma nê, ăp dak kan nsum bah rmôt kŏ ntrŭnh nau Syria mra lŏ ƀư Kruanh bah ntŭk kan ăp dak tăch luh tơm pring A-rập, rgâl ma A-rập xê-út tâm du năm, ntơm bah năm 2022. Tĭng nau uănh năl nsum bah ntŭk ƀư mêt uănh, nau kan aơ ân saơ, Syria hŏ ndâk tay jêh rlau 10 năm tâm lơh ndrel ƀư rjăp lơn nau dơi bah dak aơ tâm nkuăl./.

Nŭih rblang: H’Thi