VOV4.M’nông – Nar nđaơ (8/7(, N’gâng kan ntĭm rđău Tahen n’har bri n’gor Dak Nông ƀư rƀŭn nchră n’gul gâl trong kan n’har bri 6 khay bôk năm 2021. Tĭng N’gâng kan ntĭm rđău Tahen n’har bri Dak Nông, n’gul năm aơ, rnă njrăng mât njrăng bri dak ta trong n’har bri n’gor ntơm đăp mpăn; nău nking n’gang tăch rwăt ntŭng, luh lăp mô tâm di n’hanh njrăng n’gang srê Covid-19 geh săk rnglăy âk.

Tahen n’har bri Dak Nông rhăt jăp n’har bri rchăng n’gang luh lăp mô tâm di nău way

Ndrel đah đăp mpăn rnă njrăng ƀư tơm n’hả bri, tahen N’har bri Dak Nông hôm kơl kônh wa nkual n’har bri 1.250 nar luh, kơl ƀon lan ƀư bơi 6km trong hăn ƀon lan, nkra 6 mlâm jay an ăp rnăk geh naư rêh jêr jŏt. N’gâng kan ntĭm rđău Tahen n’har bri n’gor Dak Nông an gĭt, tâm khay tât rmôt tahen n’har bri n’hao tay trong kan nkoch trêng, rgŏ jă  ƀon lan nkual n’har bri mô ntop kơl, mpôn n’gang, ndơ̆ nuĭh luh lăp bah dih mô tâm di. Nkre, ăp ntŭk kan ntrôl dăng lơn tay ntrong leo lam ƀon lan phong tơih ăp nuĭh hăn luh lăp mô tâm di hăn Việt Nam.

Nuĭh rblang: Y Sưng Phê Ja