VOV4.M’nông - Ƀư ntĭm rđau bah Chính phủ n’hanh N’gâng kan Mât njrăng bri dak, trong kan njrăng n’gang srê Covid-19 ta trong n’har bri ta n’gor Kon Tum dôl dơi rmôt tahen n’har bri n’hao đah âk trong mkra gay nking n’gang srê lăp tâm nkual.

         Nkual mpông n’har bri quốc tế Bờ Y, ta xă Pờ Y, nkuăl Ngọc Hồi, n’gor Kon Tum geh rlău 20km trong n’har bri kâng n’har đah dak băl Lào n’hanh Campuchia geh âk nuĭh ƀon lan bâh đah ri n’har bri lăp mô tâm di. Ta năp nu nău bah lơ, Pôih tahen n’har bri mpông n’har bri Quốc tế Bờ Y lĕ ndâk njêng 6 rmôt, kâp uănh nđôi srê Covid-19 gŭ ntŭk n’hanh hăn ăp  ntŭk. Ta ăp ntŭk aơ ndrel đah 45 cán bộ. Tahen n’har bri hôm geh rmôt dân quân bah xă mât nău kâp uănh, hăn uănh nđôi njok n’har bri lĕ măng nar. Thiếu tá Đoàn Xuân Trường, Groi Đội trưởng Rmôt rgŏ jă ƀon lan, Pôih tahen n’har bri mpông n’har bri Quốc tế Bờ Y an gĭt, ăp cán bộ, tahen râng ăp rmôt, ntŭk kâp nsrôih rlet rlău jêr jŏt gay lôch uĕh nău kan:

Cán bộ, tahen Pôih tahen n’har bri bah mpông n’har bri Bờ Y uănh nđôi srê Covid-19 ta n’har bri

                   “Mpôl hên măng nar tĭng rmôt, ntŭk kâp n’hanh hăn uănh nđôi mô an geh nuĭh lăp n’hanh mât uănh rjăp mô an srê ntưp rêng. Bôl oh nô tâm rmôt, ntŭk kâp mâp jêr jŏt, đah ndoh ndơ mô tŏng. Jêh nĕ lŏ jêr jŏt yơn oh nô mkra jêr jŏt gay lôch uĕh nău kan”.

Ndrel đah n’hao mât uănh, nking n’gang nău nuĭh ƀon lan đah ri n’har bri lăp tâm ntŭk mô di nău way, Pôih tahen mât njrăng mpông n’har bri mpông n’har bri Quốc tế Bờ Y ntrôl dăng trong kan nkoch trêng njrăng n’gang srê Covid-19 an năch pâl nđaih n’hanh nuĭh ƀon lan geh mir tuch tăm êp nkual n’har bri. Cán bộ tahen bah Pôih tahen mât njrăng n’har bri tât ăp jay nuĭh ƀon lan ntĭm nuĭh ƀon lan wăn bok put mbung rnôk hăn ƀư mir n’hanh tĭng ăp nău way njrăng n’gang srê; mô an hăn nsong n’har bri mô tâm di... Săk rnglăy an saơ ndrel đah n’hao nău wât đah nău klăch bah srê Covid-19, ăp nuĭh ƀon lan ta nkual n’har bri hôm muh măt bah rmôt tahen mât njrăng n’har bri pah kan njrăng n’gang srê n’hanh mât rnă njrăng n’har bri. Wa Nang Cứu, jay ta ƀon Iệc, xă Pờ Y geh mir êp n’har bri kâng đah dak băl Lào an gĭt:

“Rnôk ƀư mir ta aơ kônh wa ƀon lan ƀa ƀơ dơi cán bộ n’har bri nkoch trêng. Kônh wa ƀon lan n’hanh he mâp nuĭh mha mbơh an phung tahen n’har bri gĭt”.

Trung Tá Đặng Nguyên Hương, Bí thư Đảng ủy, Chính trị viên Pôh tahen n’har bri mpông n’har bri Quốc tế Bờ Y an gĭt, cán bộ, tahen bah Pôih nsrôih mô an ndrăt ndal ta năp nu nău bah srê Covid-19:

Nkoch trêng njrăng n’gang srê Covid-19 an nuĭh ƀon lan nkual n’har bri yor Pôih tahen n’har bri mpông n’har bri quốc tế Bờ Y mât uănh

“Ta năp nu nău dŭt jêr jŏt bah srê Covid-19 ta Campuchia n’hanh Lào,  mpôl hên lĕ mbơh ƀư ăp trong kan njrăng n’gang n’har bri gay gĭt nu nău srê Covid-19 ta đah ri n’har bri gay ƀư nkoch trêng an nuĭh ƀon lan n’hanh cán bộ, tahen tâm ntŭk kan gĭt nu nău đah srê gay mbơh ƀư trong kan nking n’gang srê Covid-19. Nsrôih mô an srê ntưp rêng tă bah n’har bri lăp tâm nkual n’hanh tâm ntŭk kan”.

Ta năp nu nău jêr jŏt bah srê Covid-19, geh trong n’har bri jong rlău 292 km kâng n’har đah dak băl Lào n’hanh Campuchia, rmôt tahen n’har bri Kon Tum aƀaơ dôl mât uănh uănh 66 ntŭk kâp njrăng, đah rlău 400 cán bộ, tahen njok n’har bri lĕ ƀư nău kan nsum nkre mât njrăng n’har bri neh dak nkre njrăng n’gang srê Covid-19 geh săk rnglăy.

Nuĭh răk rblang: Y Sưng Phê Ja