VOV4.M’nông: Bah năp nau tât bah srê Covid-19 tâm nkuăl ƀon têh Hồ Chí Minh, N’gâng kan neh dak năn rgum rmôt nŭih, ndơ dŏng gay ma năn kơl an nau njrăng rdâng srê.

Rnôk aơ, 9/9 n’gor, nkuăl Quân khu 7 kŏ geh srê ji, tâm nê âk ngăn lah ta nkuăl ƀon têh Hồ Chí Minh đah ma rbăn nŭih du nar, jêh nê lah Bình Dương, Long An, Đồng Nai…Tĭng nau rđau đă bah N’gâng kan neh dak, N’gâng kan Quân y ndrel Quân khu 7 hŏ ngăch  ntrơn jêng nau ji jâk jru tâm ngih dak si Quân dân y Miền đông jêng ngih dak si săm srê Covid-19 ân tahen ndrel ƀon lan tâm nkuăl ƀon têh Hồ Chí Minh đah nau geh 400 nsưng bĭch ndrel ntrŭnh nau leo dŏng ngih dak si ndâk ngăch mrô 5A. Lĕ bar ngih dak si aơ săm ân 581 nŭih ji, rnoh ji hao mro tâm âk nar tâm nkuăl. Thiếu tướng, PGS.TS Nguyễn Hồng Sơn, Giám đốc Ngih dak si 175 mbơh, ngih dak si dôl ma n’hao nau dăng xét nghiệm saơ nŭih ji ntưp srê Covid-19 ndrel geh săch lah du ntŭk chuh n’gang lam ƀon lan gay ma ntrŭt jăng srê ji, rnôk aơ ngih dak si dôl ma ntrŭnh nau kan aơ:

‘Hô ngăn tâm rnôk srê mhe nơh, Ngih dak si 175 saơ rlau 175 saơ rlau 120 nŭih ji tâm ƀon lan tâm rnôk săch uănh. Du quân nhân Ngih dak si 175 hŏ ntưp rnôk ntrŭnh ƀư nau kan săch uănh tâm dâng. Phung hên hŏ dăn nau kơl bah N’gâng kan Quân y gay ma đăp mpăn ân ăp nau kan geh rklaih ndrel đăp mpăn nau kan bah ngih dak si, mô khuch tât nau dơi mra tâm lơh bah Ngih dak si. Ngih dak si kŏ dăn pă ơm máy xét nghiệm đah nau dăng 1000 ntil du nar, gay đăp mpăn ân nau ŭch ƀư kan rnôk aơ”.

Rgop nau njrăng rdâng ngăn nau ntưp rêng bah srê, rmôt kan tahen ndrel quân khu 7 hŏ n’hao nau leo ndeh xét nghiệm ndrel ndơ xét nghiệm nau dăng têh. Quân khu 7 hŏ ntrŭnh 55 ntŭk nkhah êng ân ăp nŭih F1 đah rlau 12.500 nsưng. Nkre ndâk 68 rmôt, nau kan njrăng rdâng srê jêng ăp trong, 51 ntŭk uănh joi, rlau 200 ntŭk xét nghiệm hŏ rlau 37 rbăn 800 mẫu, chuh ân rlau 10.900 tŏ chuh vắc xin ân ƀon lan rgop nau kơl mpuh n’hât srê mrô 5A gŭ săm srê Covid-19 tâm nkuăl ƀon têh Hồ Chí Minh ndrel ăp n’gor êp nê, Quân khu 7 dôl lŏ ntrŭnh nau leo ngih dak si 5B tĭng nau rđau đă bah N’gâng kan neh dak gay tŏng nau dơi săm tâm nkuăl. Thiếu tướng Võ Văn Tri, Groi Kruanh rđau kan Quân khu 7 mbơh:

‘Phung hên nchrăp ntrŭnh ngih dak si ntrơn ndâk ngăch 5B, ăp nau nchrăp kan ri phung hên hŏ lôch jêh. Rnôk geh nau đă ƀư ntrŭnh ngih dak si 5B ndrel ntrŭnh nau leo bah ăp rmôt kan ƀư biên chế, tâm quân đoàn 4 ndrel binh đoàn 16 ri phung hên tâm gleh khay 5h phung hên mra ndâk nkre ngih dak si ntrơn ndâk săm 5B Ndrel tâm 24h ndrel 24h ri phung hên mra dơi geh leo lăp kan ngăn. Ngih dak si aơ geh rnoh 150 nŭih, yor ăp ngih dak si bah Quân khu ndrel bah quân đoàn 4, binh đoàn 16 ƀư nau kan”.

Tahen kŏ rđau ăp rmôt ƀư nau kan tâm rgop nsum đah nau ndơn, pă 4.511 cán bộ, nŭih kan nai dak si ƀư nau leo kơl an ăp nkuăl tâm quân khu 7. Tâm nê, êng nau n’hao ân nkuăl ƀon têh Hồ Chí Minh 4.025 cán bộ, nŭih pah kan njrăng srê. Thượng tướng Vũ Hải Sản, Kruanh n’gâng kan neh dak mbơh srê hôm tât âk tâm nkuăl ƀon têh Hồ Chí Minh, N’gâng kan neh dak leo rmôt nŭih, ndơ dŏng tâm ăp quân khu ndrel ăp rmôt kan lam tahen lăp tâm quân khu 7, rmôt kơl an njrăng rdâng srê drel mra lơh rdâng, uănh aơ lah nau kan khlay kơt nau kan ndal ndrel nau ntul rlong đăp mpăn ân nơm:

‘Tahen êng nau n’hao nau kan ân Quân khu 7, rmôt mpuh n’hât kman rlau 20 bôk ndeh. N’gâng kan neh dak jao nau kan kơp n’ăp ma Quân đoàn 4, Thaen hoá học ndrel Quna khu 7 yor ƀon lan 24/14 tĭng nau đă kan bah nkuăl kơp n’ăp ma nkuăl ƀon têh Hồ Chí Minh, Đồng Nai, Bình Dương ndrel ăp n’gor. Êng Quân y hŏ n’hao Quân khu 7 lah 270 đồng chí ndrel ndơ leo dŏng ân quan khu 7 ndrel ngăn lah nkuăl ƀon têh Hồ Chí Minh”.

Mô êng kơl an ân nkuăl ƀon têh Hồ Chí Minh ndrel ăp n’gor geh nau srê êp nê geh tât đah rmôt leo bôk rdâng srê, tahen hôm nsôih kơl an nŭih ƀon lan tâm ntŭk geh bu nkhah gay n’huch nau jâk. Ăp nar rlau aơ, ăp rmôt kan bah tahen hŏ kơl an kônh wa tâm nkuăl ƀon têh Hồ Chí Minh rlau 70 tấn byăp rih, bum play, rlau 41 rbăn tăp djăr, 50 tấn phe, hang rbăn thùng mỳ tôm ndrel âk ndơ dŏng êng êng. Bah nau kan “rêng nau tâm rŏng”, “Ngih kơl an tahen”, “siêu thị kloh”, “phe mô roh prăk”…ăp ntil dnơ ta ưbah mpang ty tahen hŏ tât ma ƀon lan, ƀư duh răm nuih n’hâm bah ƀon lan nkuăl nchueng rdâng, rhop nau nsum ty kơl an rlet nau jêr, nsôih ntrŭt jăng lơi srê ji./.

Nŭih rblang: H’Thi