VOV4.M’nông: Săk ranh, lŏ lah tahen sôt rmanh, yơn wa Hoàng Biên Thuỳ tâm xã Hoà Xuân, nkuăl ƀon têh Buôn Ma Thuột, n’gor Dak Lak hôm nsôih râng nau kan kơl an. Bah năp nau tât bah srê Covid-19 geh nau tât jêr, đah nau kan lah Kruanh rmôt tahen ơm bah xã, wa Thuỳ hŏ geh âk nau kan ngăn ƀư tâm nau njrăng rdâng srê.

Ntơm rnôk geh srê Covid-19 tal 4 ntoh tâm nkuăl, bol ma tâm ngih yơn bah ntŭk nkoch mbơh tâm Zalo bah rmôt tahen ơm bah xã, wa Nguyễn Văn Bằng, tâm Thôn 1, xã Hoà Xuân, nkuăl ƀon têh Buôn Ma Thuột, n’gor Dak Lak hôm gĭt kloh ăp nau geh bah srê ji. Wa Bằng mbơh, rmôt Zalo aơ yor wa Hoàng Biên Thuỳ, Kruanh rmôt tahen ơm xã Hoà Xuân nkra ndrel geh mbơh nau mro:

‘Nkoch trêng mpeh nau njrăng rdâng srê đah Zalo ri ntŭk nô Thuỳ nê blau ngăn ri păng ntĭm mbơh kloh ngăn, tă bah nau mbơh, nau rđau đă jêh ri nau geh tât bah srê ân ăp rơh ngăn gay ma nơm gĭt kloh năn gay nkoch trêng ân kônh wa”.

Mô êng gĭt ăp nau mhe ndrel ntĭm ân kônh wa dŏng Zalo gay ma uănh joi gĭt kloh mpeh srê, wa Hoàng Biên Thuỳ hôm ndăn tât ăp ngih bah ƀon lan gay ma nkoch trêng. Lah nŭih tâm rnâng kan rđau nau njrăng rdâng srê bah xã, wa Thuỳ geh jao nau kan ƀư tâm thôn 1 ndrel thôn 4. Ăp rnôk geh nau mhe, păng lŏ ndrel ma mrôt njrăng rdâng srê bah thôn tât ntĭm mbơh ân kônh wa. Yuh Nguyễn Thị Sơn, ta Thôn 1, xã Hoà Xuân, nkuăl ƀon têh Buôn Ma Thuột, nkoch:

‘Gâp saơ wa Thùy gơih ngăn tâm nau kan hăn tât ăp ntŭk gay ma nkoch mbơh mpeh nau njrăng rdâng bah srê lah nsum, ntĭm mbơh ân ăp nau ngăn gay ma kônh wa dơi gĭt mpeh nau mhâm dŏng Zalo. Lah ueh ngăn wa Thuỳ, bol ma săk ranh, rlu hôm yơn lah hôm gơih ma nau kan ân kônh wa ta aơ”.

Hoà Xuân lah du xã hvi ngăn neh, geh trong hăn ăp nkuăl nthoi ma Quốc lộ 14 hăn tât nkuăl Buôn Đôn, Ea Súp. Tâm xã hôm geh rlau 300 nŭih hăn kan tâm ăp n’gor Đồng Nai, Bình Dương ndrel nkuăl ƀon têh Hồ Chí Minh. Gĭt kloh ăp nau aơ ri ma nau kan bah aơ nŭuh tâm nau rđau kan njrăng Covid-19 bah xã, wa Thùy nsôih ngăn kơl nchră nau ân rđau kan ăp nau nkoch mbơh, ntĭm ân ƀon lan. Rnâng kan rđau nau kan njrăng srê Covid-19 bah xã Hoà Xuân kŏ vay tât ăp thon, ƀon gay ma ntim nau njrăng srê. Kơp uănh ăp nŭih tă bah n’gor êng ndrel nkuăl êng sĭt tâm nkuăl, kơl ƀon lan dŏng Bluezone. Ndrel ma nê, wa Thuỳ hôm nchrăp ndâk rmôt Zalo ndrel ntĭm ăp nŭih dŏng ân nơih ân nau kan nkoch trêng njrăng srê.

Wa Hoàng Biên Thuỳ nkoch, wa lah tahen, tă rlet uănh tâm ntrong mât kan, rđau kan ri wa kŏ gĭt đŏng mpeh nau mhe. Dơi geh nau rnơm pă nau kan bah Đảng uỷ ndrel rmôt kan ba lơ, săk wa bol ma ranh yơn hôm ŭch rgop n’hâm nơm tâm nau kan nsum:

‘Đah nuih n’hâm kan bah nŭih tahen ơm kŏ ân geh ntoh nau mĭn, nau kan bah tahen Wa Hồ, bol ma lah du têh ơm, tahen sôt rmanh yơn nau kan bah Đảng jao ri nơm ƀư ân jêh. Tâm rơh aơ gâp kŏ mro hăn nsum ma oh nô gay ma nkoch trêng, bonh đă gay ƀon lan gĭt nau njrăng srê Covid-19 mhâm ân ma ueh. N’ăp ma nau nkoch ma mbung mô lah pơk tâm ntŭk nkoch mbơh nau, dŏng điện thoại gay ma mbơh ân bu gĭt nau njrăng rdâng srê, nê lah nau kan bah nơm nsum ma lam nau rêh”.

Lah tahen 4/4 ndrel bơi tât 70 năm, yơn tâm âk năm, wa Thuỳ mro nsôih râng nau kan bah nkuăl. Tĭng wa Nguyễn Đức Thuận, Bí thư Đảng uỷ Xã Hoà Xuân, nkuăl ƀon têh Buôn Ma Thuột, bah 2 gưl kan ƀư Kruanh rmôt tahen ơm, wa Thuỳ gơih ngăn bonh đă bu râng nau kan. Âk tahen ơm hŏ ndâk njêng ƀon lan mhe, pa ưneh nkra trong, hun hao văng sa ndrel kơl an ăp nŭih mâp jêr.

Ngăn lah, ntơm rnôk geh srê Covid-19 ntoh luh tâm năm 2020 tât rnôk aơ, bol ma xã Hoà Xuân ê geh saơ nŭih ntưp yơn nau kan njrăng rdâng srê tâm nkuăl mro geh n’hao prêh. Đah nau kan lah Kruanh rmôt tahen ơm, wa Thuỳ hôm nkoch mbơh, bonh đă ăp cán bộ tahen ơm râng uănh nau kan tâm thôn, ƀon gay ma nkoch trêng, nkân nŭih lih lăp, ƀư ueh nau kan njrăng srê:

‘Đảng uỷ rnê prêh ngăn, đồng chí ƀư Kruanh rmôt tahen ơm 2 gưl kan, bol ma rnôk aơ bơi 70 năm yơn đah nuih n’hâm hôm gơih, nsôih hôm leo lor tâm ăp nau kan, ngăn lah nau ndâk njêng gưl kan bah rmôt kan, ndâk njêng đảng, ndâk njêng n’gâng kan. Ngăn lah êp aơ lah xã ndâk rnâng kan rđau nau njrăng srê ri tâm nê geh đồng chí Hoàng Biên Thuỳ râng tâm nau kan njrăng rdâng srê Covid-19 kŏ râng nau kan nkoch trêng ueh ngăn”.

Năm lĕ âk, săk lĕ ranh, lŏ geh nau ji, đah nau n’hâm nau kan bah tahen ơm rnok sĭt, tahen ơm Hoàng Biên Thuỳ hŏ geh âk nau rgop ân nkuăl. Bah năp nau tât bah srê ji, nuih n’hâm “njrăng srê kơt njrăng phung rlăng” dôl geh ntô̆ n’hao ri nau kan bah wa lơn ma jêng ueh, khlay, rgop nau ndrel n’gâng kan ndrel ƀon lan njrăng, rdâng ndrel ntrŭt jăng lơi srê ji Covid-19./.

Nŭih rblang: H’Thi