VOV4.M’nông: Ta nkuăl Ea H’leo, n’gor Dak Lak, nău kan ntĭm n’hanh nti lĕ ƀư ngăch ăp trong ntĭm n’hanh nti ngăn n’hanh trực tuyến đăp mpăn ntĭm nti an kon hŏk ta năp nu nău jêr jŏt bah chôt srê Covid-19.

          Rlău du pơh aơ, jêh rnôk srê Covid-19 dơi uănh nđôi, Ngih sam ƀŭt tiểu học Ea H’leo, nkuăl Ea H’leo lĕ ngăch ƀư an kon hŏk plơ̆ tay jrô nti. Nai Nguyễn Văn Tân, Hiệu trưởng an gĭt, aƀaơ ngih sam ƀŭt geh 16 jrô đah 523 kon hŏk, tâm nĕ kon hŏk rnoi mpôl đêt 126 oh.

          “Gay đăp mpăn trong kan ntĭm nti đăp mpăn an ăp mon, ngih sam ƀŭt lĕ tâm ôp tâm nchră đah ăp gưl puh rao, răk, năp dak rao ty. Ngih sam ƀŭt ƀư tâm pă jêt jrô nti gay đăp mpăn rnoh nuĭh bah dâng 30 kon hŏk du jrô. Ngih sam ƀŭt tâm ôp tâm nchră đah ăp gưl chuh tŏng ăp an rmôt cán bộ, nuĭh pah kan. Đah rnoh kon hŏk an rlu tât ngih sam ƀŭt yor nău geh ăp oh an nkhah êng ri ngih sam ƀŭt lĕ pă trong ntĭm nti an ăp mon đah trong ƀư jao an bài”.

Ngih sam ƀŭt tiểu học Ea H’leo plơ̆ tay nti ngăn

          Oh Nguyễn Phạm Bảo An, kon hŏk jrô 5A, ngih sam ƀŭt Tiểu học Ea Hleo dŭt răm yor dơi hăn nti tay ta ngih sam ƀŭt jêh âk khay gŭ tâm ƀah yor srê.

          “Rnôk oh tât ngih sam ƀŭt saơ dŭt răm yor dơi mâp băl n’hanh ăp nai. Rnôk oh nti ta jay ri ăp bài jêr oh mô dơi ôp nai ma nchih tâm zalo gay ôp. Hôm nti ngăn ta ngih sam ƀŭt ri nai dơi ntĭm nti an oh dâl”.

          Ngăch ăp trong ƀư ntĭm n’hanh nti ngăn-trực tuyến, jao bài... bôl tĭng nău chôt srê Covid-19 lĕ dơi ăp ngih sam ƀŭt ta nkuăl Ea H’leo, n’gor Dak Lak ƀư dŭt uĕh. Nai Nguyễn Thị Minh Trường, Groi hiệu trưởng Ngih sam ƀŭt Tiểu học Ea Khăl an gĭt: gay nău ntĭm nti trực tuyến geh tam, ngih sam ƀŭt lĕ ntuh kơl trong ƀoh, ndâk njêng trong ntĭm nti tâm di; nai nchrăp bài ntĭm tĭng trong mhe, săch nkô̆ nău di, nai tâm ban ŭch gay lĕ rngôch kon hŏk dơi gĭt. Bơi 500 kon hŏk, tâm nĕ geh 210 oh nuĭh rnoi đêt ta Ngih sam ƀŭt tiểu học Ea Khăl, xă Ea Khăl, nkuăl Ea H’Leo lĕ tâm di đah nău nti trực tuyến.

          “Ngih sam ƀŭt ƀư ăp oh nti trực tuyến dơi an ăp oh nti trực tuyến, ăp oh gŭ ta jay ndrel du jrô aơ dơi hăn jrô êng gay nti nsum, geh 2 oh, 3 oh du măy. Ăp oh mô geh ndơ nti trực tuyến ri ngih sam ƀŭt ƀư jao bài. Geh ăp oh tă bah nuĭh bên hăn ta nkual êng sĭt ăp oh mô dơi tât ngih sam ƀŭt, mô dơi hăn jay băl nti dơi đă ăp nai tât jay jao bài an ăp oh. Ăp nuĭh ta nkual nkhah êng ăp nai mô dơi tât mbra đă tât n’gâng kan ƀon lan, tât rmôt Covid-19 ntŭk gŭ rêh kơl”.

Ntĭm nti ngăn, ăp ngih sam ƀŭt an tŏng ăp đăp mpăn njrăng n’gang srê

          Nkuăl Ea H’leo aƀaơ geh 67 ngih sam ƀŭt đah rlău 29.000 kon hŏk bah mầm non tât trung học cơ sở. Wa Phạm Văn Đảng, Kruanh jrô kan ntĭm nti nkuăl Ea H’leo an gĭt: Yor chôt srê mô hŏ dơi uănh nđôi, lam nkuăl mhe geh n’gul rnoh ngih sam ƀŭt an ntĭm nti ngăn. Trong kan đăp mpăn njrăng n’gang srê dơi ăp ngih sam ƀŭt ƀư rjăp. Ăp ngih sam ƀŭt ƀa ƀơ ƀư uănh, kơp ăp kon hŏk geh nuĭh bên sĭt bah nkual srê dôl nkhah êng ta jay gay geh trong nti tâm di.

          “Mpeh đah jrô kan ntĭm nti lĕ geh sam ƀŭt ntĭm rđău ăp ngih sam ƀŭt ndâk njêng trong nchrăp, ƀư ntĭm nti. N’hanh ăp nai an ndâk njêng trong ƀư ntĭm nti an jrô nơm, tâm nĕ uănh khlay nău uĕh ntĭm nti an tĭng nuĭh kon hŏk. Bôl đah trong ƀư ri nău wât khlay bài nti an kon hŏk dơi gĭt, rnôk uănh nđôi ntŭk tât nti uănh nđôi tât nĕ. Ndăn mông nar mô geh ntưp rnôk kon hŏk tât ngih sam ƀŭt gay nâp nâl nău wât blău ăp oh nti trực tuyến đăp mpăn uĕh blău. Rnôk ma geh nău đah F0 n’hanh ta nkual nĕ mô đăp mpăn ri ăp mon an nti bah kơi, trực tuyến, jao bài. Hôm rnôk rgâl nkual đăp mpăn saơ uĕh, ƀư ntĭm nti đăp mpăn ri Mpôl ntĭm rđău bah xă, hiệu trưởng ngih sam ƀŭt mbơh ăp mon tât ngih sam ƀŭt”.

          Tât aƀaơ, ta nkuăl Ea H’leo nai n’hanh kon hŏk mô hôm mha tâm nău rgâl ngăch ăp trong nti nsơm. Trong kan nchrăp an nău ntĭm nti trực tuyến kơt nti ngăn bah ăp ngih sam ƀŭt lĕ ƀư di uĕh, kơl kon hŏk tĭng ngăch nkô̆ nău, bôk nău kan nti.

                    Nuĭh rblang: Y Sưng Phê Ja