VOV4.M'nông: Tâm nchră dak si lam ntŭr neh hŏ ntơm pơk ta thủ đô Berlin bah Đức. aơ lah ngoăy tâm rơh tâm nchră lam ntŭr neh dŭt khlay mpeh n'hâm suan, ƀư tâm rnôk lam ntŭr neh dôl mbrôn suan he rdâng lơh đah nuh srê Covid-19, ơm hŏ ƀư ntưp rêng an rlău 244 rkeh nuĭh n'hanh  bơi 5 rkeh nuĭh khĭt lam ntŭr neh. "Nuh srê hôm jŏ mơ lĕ bah", yơn "nău dơi dŭt bah gŭ tâm mpang ti he nơm"- nê lah nău năl bah Nuĭh mât bôk kan nhih dak si lam ntŭr neh ndơ̆ luh ta rnôk tâm nchră; ndrel âk nău kuăl jă êng ƀa ƀă mpeh nău tâm ban geh vaccine bah ăp kruanh rđău kan lam ntŭr neh đŏng. Lah ta rnôk ntơm pơk tâm nchră pơk sŏng dăng, Tổng thư ký Liên Hợp Quốc Antonio Guterres nkah tay nău kuăl jă lam ntŭr neh tâm pă vaccine njrăng n'gang Covid-19 du trong tâm di lơn. Păng năl lah, lam ntŭr neh ân geh ngăch nklăp 8 rmen đôlar an pah kan đăp mpăn tâm pă vaccine geh nău tâm ban. Jêng, Liên hợp quốc kuăl jă ăp dak G20 ân ntop kơl an rnoh tât kan dja ta rnôk tâm nchră bơi tât./.

Nuĭh rblang: Điểu Thân