VOV4.M'nông: Tâm nău lah tâm ôi nar (20/9), lor rnôk hăn tât Mỹ râng tâm nchră gưl têh Nkôp puăn (Quad), Thủ tướng Australia Scott Morrison an gĭt nkô̆ nău rnă njrăng bah nkual Ấn Độ Dương-Thái Bình Dương mbra lah rgum tơm tâm rơh mâp bah păng đah Tổng thống Mỹ Joe Biden n'hanh ăp kruanh rđău kan êng ƀa ƀă. Tĭng trong nchrăp, tâm rnôk hăn khâl 4 nar tât Mỹ, Thủ tướng Australia mbra râng tâm nchră gưl têh lĕ rngôch nkôp puăn đah Tổng thống Mỹ Joe Biden, Thủ tướng Nhật Bản Suga Yoshihide n'hanh Thủ tướng Ấn Độ Narendra Modi. Tĭng radio nkoch trêng nău lư Australia, tâm rơh rgum nchră tâm nar prăm tât (24/9), ăp kruanh rđău kan rmôt nkôp puăn mbra mbơh tâm boh tâm nău ƀư njêng n'hanh pă an vaccine Covid-19.

Nuĭh rblang: Điểu Thân