VOV4.M’nông: Nar ntri (19/07), Tổng thống Pháp Emmanuel Macron n'hanh ăp kruanh rđău kan nkual mpeh bah dâng Thái Bình Dương hŏ ƀư tâm nchră gưl têh pơk sŏng dăng gay tâm nchră mpeh du đêt ăp nkô̆ nău tâm nkual, tâm nê ntoh lư lah ăp nkô̆ nău kơt, nuh srê COVID-19, rnă njrăng dak lêng, Thế vận hội Paris 2024 n'hanh mât njrăng ntŭk gŭ rêh. Tổng thống Pháp lah rjăp đŏng nău khlay bah nău way COVAX, Nău mĭn mhe bôk nău kan tâm boh lam ntŭr neh rdâng lơh COVID-19 hŏ pă an bơi 800 rbăn dĭng vaccine an nkual Thái Bình Dương, nkah tay nău ton bah Pháp mpeh nău pă an 60 rkeh dĭng vaccine tâm nău way trong kan COVAX, nkre lah rjăp nkual Thái Bình Dương mbra nsĭt geh dŏng bah nău tâm ton dja. Tâm nchră  gưl têh Pháp - nkual mpeh bah dâng Thái Bình Dương tâl 5 hŏ rgum ăp kruanh rđău kan bah âk bang  n'hanh nkual neh êng ƀa ƀă tâm nkual, lĕ ma Australia, New Zealand, Fiji, Papua New Guinea, Samoa n'hanh Polynesia.

Nuĭh rblang: Điểu Thân