VOV4.M’nông:  Trung ương Đoàn druh ndăm Cộng sản Hồ Chí Minh, Trung ương rmôt druh ndăm Việt Nam mhe ƀư Bôk nau kan kơl an ndoh ndơ dŏng ân druh ndăm công nhân ndrel ƀon lan geh ntơ “ Pă ăp nau ŭch rŏng, nsum ty rlet bah srê”. Aơ lah nau kan kơt tĭng nau kuăl jă bah Thủ tướng Chính phủ tâm nau nsum ty, rgop n’hâm kơl an, tâm kơl druh ndăm công nhân ndrel ăp rnăk mâp nau jêr yor geh nau khuch tă bah srê Covid-19.

Bôk nau kan ntrŭnh ntơm lơ 15/7/2021 tât lơ 30/6/2022. Ngăn lah, rnôk rvăt ăp ntil ndơ bah App rvăt MEGA1 mô lah ăp ntŭk tăch ndơ bah Bôn nau kan, druh ndăm công nhân, ƀon lan mra geh ntŭk kan, nau tăch râng bôk nau kan geh n’huch tât 50% rnoh tăch ndơ.

Rnôk aơ geh nau kơl an, hăn nsum bah ăp ntŭk kan tâm dak. Wa Nguyễn Ảnh Nhượng Tống-Kruah Hội đồng quản trị Công ty cổ phần Rmôt kan Yeah 1, rmôt kan ƀư nau aơ, mbơh, rnôk aơ bôk nau kan aơ dôl pă tăch ndơ dŏng geh: phe, dak măm, dak toh ndrôk, dak ngi…êng nê, gay kơl an ăp mrôt kan, ntŭk kan tăch rgâl, nŭih geh nau ŭch ƀư nau kan đah nau kơl an ƀon lan geh nau rêh jêr yor srê Covid-19. Công ty cổ phần rmôt kan Yeah1 kŏ pah kan đah ăp rmôt kan ê nkra ntil ndơ geh rvăt tay ndơ đah rnoh tăch nơih, tă bah nê n’huch rnoh tăch ân ƀon lan:

‘Phung hên hŏ nkra ăp combo gay ma mhâm ƀư nŭih rvăt dŏng du khay ân trok rlau 100-200 rbăn ma geh dơi dŏng sa tŏng du khay, phung hên kŏ ndŏ luh ăp nau mô ueh gay ma ƀon lan dơi geh rvăt dŏng du ntil ndơ lôch du khay. Rnôk aơ, nau geh ê nkra tâm dak aơ ndŏ luh ê tât 50 combo nkô̆ nau khay ba kơi hao rlau 200 rbăn combo, nar lơn ma hao âk”.

Wa Nguyễn Ngọc Dũng, Groi Kruanh mrôt kan tăch rgâl điện tử Việt Nam mbơh: rnôk aơ rmôt kan mra hăn nsum bôk nau kan rgum ăp ntŭk kan tăch rgâl điện tử têh tâm dak ndrel ăp ntŭk kan tâm nau kan ƀư njoăl leo mra kơl an leo ndoh ndơ tât đah nŭih dŏng:

‘Êng rmôt kan điện tử kơl an ân bôk nau kan leo ndơ tât nŭih dŏng ngăch ngăn, rnôk aơ rnâng kan kŏ dôl ma rgum ăp oh nô gay ma ƀư njêng nau kan uănh năl ntil ndơ kloh, ton pa ửnoh tăch njoăl ân ăp nŭih, mô geh nau êng mpeh nau nâp kah mô lah ân ƀon lan mĭn n’hao rnoh khlay jêh ri n’huch jur dêh”.

Ntrŭnh tâm 63 nkuăl, nkuăl ƀon têh tâm lam dak, yơn lah, bôk nau kan kơl an tâm ăp n’gor, nkuăl ƀon têh dôl ma geh srê âk bah srê Covid-19. Ngăn lah, tâm khay 7, 8, 9 bôk nau kan pă ân nkuăl ƀon têh Hồ Chí Minh, Bình Dương ndrel ăp nkuăl êp nê. Nau kan mra pơk hvi lơn tâm khay ba kơi nsing tâm nau kan ngăn.

Bah năp nê, gay kơl an kônh wa ƀon lan tăch ndơ bah nơm, tâm ban ma nau srê Covid-198, Trung ương đoàn druh ndăm Hồ Chí Minh hŏ ƀư bôk nau kan “Nthoi leo ndơ tuch tăm-tâm pă nau rŏng-Nsum ty rlet rlau bah srê”. Ăp rmôt kan, ntŭk kan hŏ ton nau nsum ty kơl an đăp mpăn nau rêh jêng, kơl an nŭih pah kan rlet rlau srê Covid-19, nkre ntrŭnh ân geh săk tam nau rgŏ jă “Nŭih Việt Nam dŏng ndơ Việt Nam”.

Tĭng Bí thư bôk năp Trung ương Đoàn druh ndăm Cộng sản Hồ Chí Minh Nguyễn Anh Tuấn, đah nau nthoi nau kan tăch ndơ bah ntŭk tăch sŏng ndrel tăch tâm mạng, rmôt kan druh ndăm tâm rgop ma ăp n’gâng kan, ntŭk kan chính trị rêh jêng kơl dŏng n’hâm dăng bah ntrong kan, dŏng nau geh dơi bah nau rgâl mrô gay kơl rvăt dŏng ndơ ân ueh ngăn kơl an ƀon lan tâm rnôk srê aơ:

‘Phung hên ŭch lah, đah nuih n’hâm blau mhe kơl an aơ mra lŏ ƀư dơi nau dŏng ueh tâm rnôk tât gay mô êng nthoi ndơ tuch tăm tâm pă nau ŭch rŏng nsum ty rlet nau jêr bah srê ma hôm ndrel N’gâng kan tuch tăm ndrel hun hao ƀon lan ƀư ân dơi nau kan mpeh nau ntrơn rgâl ndrel hun hao tuch tăm tâm rnôk mhe”.

Đah nau dơi lah tâm pă nau mbăk jâk nsum ma hang rkeh rnăk vâl Việt rlet nau kan kơl rnoh tăch rvăt dŏng ndơ, bôk nau kan kŏ rgop ƀư nau kan “nkô̆ nau bar ntil kan” nkre njrăng rdâng srê, nkre mât, hun hao nau kan ê nkra tăch rgâl bah nau kơl an ma rkeh nŭih kan, công nhân tâm ăp ngih máy, ntŭk kan đah ăp ntil ndơ dŏng geh mât nau kan pah, n’huch nau roh kan pah yor srê Covid-19, lơn ma nê lah nau rgop nau ndâk tay văng sa dŏng ndơ./.

Nŭih rblang: H’Thi