VOV4.M’nông – Ta năp nău tât mô gĭt năl lor bah nuh srê Covid-19, n’gâng kan ta ntŭk n’hanh ăp nhih pah kan dơi kan ăp n’gor tâm nkual Tây Nguyên hŏ n’hao dăng pah kan njrăng n’gang. Ndrel đah nău nking kâp nău lăp bah n’har bri, an gŭ êng du đêt nuĭh geh tât nuĭh ji nuh srê Covid-19, n’gâng kan dak si, ntĭm nti an ƀư ăp trong nkra gay nking nchăng dŭt tam nău ntưp rêng bah nuh srê.

Ta Kon Tum, tahen n’har bri n’hao âk tay mpôl kan gay nking nchăng ăp nuĭh hăn rlău n’har bri ta bar njrăr trong n’har bri kâng đah Lào n’hanh Campuchia. Na nê|, bơi 100 sỹ quan, quân nhân chuyên nghiệp dơi n’hao an 8 Pôih n’har bri bah n’gor Kon Tum. Đại tá Lê Minh Chính, Chính ủy Bộ đội Biên phòng n’gor Kon Tum an gĭt, ndrel đah nău n’hao âk tay mpôl tahen, cán bộ, tahen ta n’har bri jong rlău 292km kâng đah Lào n’hanh Campuchia way dơn geh nău uănh khlay, rgŏ jă lĕ ma nuih n’hâm n’hanh drăp ndơ tâm rnôk tĭng ƀư nău kan ndrop mât njrăng n’har bri n’hanh njrăng n’gang nuh srê COVID-19:

Rmôt tahen n'har bri nkoch trêng njrăng n'gang srê Covid-19

          Rlău ma trong kơl bah Đảng, Ngih dak,tahen uănh khlay ri Tỉnh ủy, UBND n’gor tâm ban kơt ăp nhih pah kan hŏ tât khâl, rgŏ jă oh nô, ntop kơl oh nô ăp ndơ dŏng dak si, ăp ndơ dŏng mpeh dak dŏng, mpeh điện măt nar gay ntop kơl du gâl kơl oh nô đăp mpă\n gŭ krêp dêh ta n’har bri. Mpôl hên tĭng ƀư jăp trong rƀŏng 4 ta ntŭk. Ta ntŭk ơm geh tu dak hoch êng ri oh nô kơi mât rong tay gay n’hao săk kah ndơ sông sa an tahen n’hanh mât rnoh kah sa tâm ban kơt gŭ ta Pôih gay oh nô geh n’hâm suan dăng gay hăn kan ndrop.

Ta năp năp nău tât krit nji bah nuh srê, Ủy ban Nhân dân n’gor Dak Lak hŏ rđău đã Kruanh ủy ban nhân dân gưl nkuâl, gưl xã kan nsum đah ăp nhih pah kan geh tât rđău đă dŏng ăp trong mpăng đêt gay njrăng, n’gang nuh srê ta n’gor ntơm bah n’gul măng nar 10/5/2021 an tât rnôk geh nău mbơh mhe. na nê|, rgum ăp nău kan rgum hop, ăp nar ntŭk rgum kan rlău 30 nuĭh tâm 1 jrô (êng ăp rgum nchră mâp cử tri tĭng ƀư di quy định bah Ủy ban bầu cử n’gor); mpăng đêt rgum âk nuĭh bah dih nhih pah kan, nhih nti, nhih dak si; rlu lĕ rngôch ăp nău kan rgum âk nuĭh an ăp nău kan geh rgum âk rlău 30 nuĭh ta ăp ntŭk chroh rƀŭn, ôp brah lah yang; rlu lĕ rngôch ăp nău an văn hóa, thể thao, pâl rlưn ta ăp ntŭk rgum âk nuĭh; rlu ƀư ăp nău kan nđăp nsao, liên hoan, lăp jay mhe...đah nău khĭt yot đă nuĭh ƀon lan ƀư đêt ngăch, lơi ir an rgum âk nuĭh n’hanh tĭng ƀư jăp nău wăn bok put mbung, puh nkhĭt kaman.

Nkual nkhah êng ta n'gor Dak Lak

Tât rnôk dja, Dak Lak hŏ năl geh 2 hê ntưp đah SARS-CoV2, ndrel gŭ tâm 1 rnăk ta nkual ƀon têh Buôn Ma Thuột. Trong nkual geh 2 hê nuĭh ji dja hŏ dơi mpă wêl. 1 nhih nti mầm non, ntŭk geh mon F1, gŭ ndrel đah 2 hê nuĭh geh ntưp, hŏ ntĭl mpông nhih nti gay ƀư puh nkhĭt kaman đŏng. Tă bah geh 1 hê kon se mầm non là F1 bah nuĭh ji 3237, UBND n’gor Dak Lak hŏ n’glêh an ăp nhih nti mầm non ta nkual ƀon têh Buôn Ma Thuột rlu 1 pơh, gay an ƀư ăp trong njrăng n’gang. Geh tât ăp kon se nti gŭ tâm trôm ntŭk geh mpă wêl, wa Đoàn Ngọc Thượng, Groi kruanh UBND nkual ƀon têh Buôn Ma Thuột an gĭt:

Đah ăp kon se nti aƀaơ dôl nchrăp lăp tâm rơh thi học kì bar bah năm nti 2020-2021 ri mpôl hên hŏ rđău đă ăp mpôl kan dơi kan hăn ôp uănh tâm nkual an gŭ rgum êng gay nchih săk na nê|. Lôch geh săk nchih na nê| ri mpôl hên an kơi ntop thi tay bah kơi nkhêp ăp kon se mô dơi râng thi nsum bah rơh thi học kỳ bar năm nti 2020-2021.

 Ôi 10/5, Ntŭk rgum mât kân nuh srê n’gor Dak Lak an gĭt hŏ lôch jêh uănh năl bôk năp ăp nuĭh tâm nkual geh mpă wêl geh tât ăp nuĭh ji 3237 n’hanh 3334. Tĭng nê, lĕ rngôch ăp nuĭh ta nkual geh mpă wêl ta hẻm 189/1 Mai Hắc Đế, phường Tân Thành (nkual ƀon têh Buôn Ma Thuột, Dak Lak) lah 144 nuĭh lôch uănh năl bôk năp mô geh ntưp đah SAR-CoV-2.

Nuĭh ƀon lan n'gor Dak Nông mbơh tơih săk soan an nai dak si

Pơh bah năp nơh, UBND, ăp n’gor Dak Nông, Lâm Đồng, Kon Tum hŏ geh si ƀŭt njuăl đă manh rlu du đêt nău kan rhŏ dŏng gay tĭng ƀư jăp pah kan njrăng n’gang nuh srê Covid-19. Tĭng nê, du đêt nău kan rhŏ dŏng mô lăng khlay ngăn kơt quán bar, karaoke, vũ trường, ndơ pâl rlưn điện tử geh ma nău ntưp rêng nuh srê Covid-19 ta n’gor ân manh rlu nău kan. Ƀan rđău đă njrăng, n’gang nuh srê ta n’gor Dak Nông đă ăp mpôl kan dơi kan n’hanh nhih pah kan rnâng kan tâm boh nsum n’hao dăng groi nđôi nuh srê ta ăp nkual mpông n’har bri, nkual n’har bri. Nhih pah kan dơi kan n’hao dăng pah kan hăn groi nđôi tĭng ƀư wăn bok put mbung, gŭ tâm ƀah srang ngai ta ăp ntŭk rgum âk nuĭh, lơn lah ta ăp nkual, ntŭk rgum pâl nđaih; tĭng ƀư rmal ăp nuĭh tih tĭng quy định.

Tâm pơh bah năp nơh đŏng, ta nkual Tây Nguyên geh du đêt nuĭh ân gŭ rgum êng yor geh tât nuĭh ji Covid-19. Na nê|, Trung tâm Y tế nkuâl hŏ ƀư an gŭ rsang ngai êng 1 hê nuĭh F1 đah nuĭh ji COVID-19 ta n’gor Vĩnh Phúc n’hanh dôl ndăn ngăch ƀoi tĭng nuh srê. Geh 6 nuĭh mâp dăch đah F1 ta nkuâl Sa Thầy hŏ dơi an gŭ srang ngai êng gay tĭng groi nđôi đŏng. Hôm ta Dak Lak, pơh bah năp nơh, Trạm y tế thị trấn Ea Pốk, nkuâl Cư M’gar geh dơn 1 hê nuĭh tât mbơh ngăch dăng n’hâm suan rnôk tă sĭt bah nkual ƀon têh Đà Nẵng. Nuĭh ji dja geh mpơl nuh srê n’hanh toh mpơl nău ji Covid-19 kơt ji siăk, hor muh...Lôch rnôk tăng nău lư, nuĭh dja hŏ dơi sŏk mham njuăl tât Viện Vệ sinh dịch tễ Tây Nguyên gay uănh năl n’hanh dôl kâp mbơh gĭt năl ntưp. Aƀaơ nuĭh dja hŏ dơi njŭn tât ntŭk an gŭ rgum êng ta Khoa ntưp bah Trung tâm y tế nkuâl Cư M'gar./.

Nuĭh rblang: Điểu Thân