VOV4.M’nông: Ndrel ma lam dak, nar naơ, cử tri tâm ăp n’gor bah nkuăl Tây Nguyên hŏ ntơm săch kan ntơh măt Quốc hội gưl XV ndrel ntơh măt HĐND ăp gưl năm kan 2021-2026. Aơ ngăn ngên lah nar rgum bah lam ƀon lan, ntoh nau dơi ndrel nau kan bah ăp cử tri tâm nau săch ăp nŭih geh tŏng nau dơi ndrel nau blau, ngăn ngên ntoh ân nyih n’hâm, nau ŭch ndrel nau ƀư tơm bah ƀon lan.

            Ta Gia Lai, ntơm ơm ôi lơ 23/5, jêh rnôk ntơm rƀŭn dĭng lĕ, gleh, cử tri ta 1.437 ntŭk săch kan tâm 220 xã, tâm 17 nkuăl, nkuăl têh, nkuăl ƀon têh hŏ ntơm hăn nklăch phiếu. Jêh rnôk ƀư nau dơi ndrel nau săch kan bah nơm, yuh Kay, tâm xã Đăk Ta Ley, nkuăl Mang Yang, n’gor Gia Lai, ngơi:

             ‘Nar săch kan ntiưh măt Quốc hội ndrel ntơh măt HĐND ăp gưl, gâp saơ geh nau rhơn ngăn yoor dăch geh ndjôt tâm ty n’ha phiếu săch. Gâp ŭch lah mra săch dơi ăp nŭih tŏng nau dơi, nau blau, mât chăm hun hao văng sa ân ƀon lan ndrel ngăn lah kơl an tât nau rêh bah druh ndăm, ntĭm nti, mbơh nau kan ndrel kơl an druh ndăm ndâk nau kan”.

          Tahen Biên phòng nklăch phiếu ta Đăk Ruê

  Lah xã geh 78% cử tri lah rnoi K’ho, nau khu n’gôr tâm Đạ Nhim, nkuăl Lạc Dương, n’gor Lâm Đồng geh ueh ngăn, ntoh nuih n’hâm ƀon lan ƀư tơm. Wa Cil Yŭ Hang Giảng, 63 năm, ta ƀon Liêng Bông, xã Đạ Nhim ân lah, nau săch kan rơh aơ geh nau khlay đah ƀon lanb, yor wa rnơmn lah ăp nŭih geh nau dơi lăp kan Quốc hội drel HĐND ăp gưl mra lah ăp nŭih ntoh mpeh nau dơi ndrel nau ŭch bah nŭih ƀon lan. Khân păng mra rgop nau ndâk njêng ăp nau kan ân tâm di, tâm ne êgh nau đăp mpăn nau kơl an nau rêh, jut n’huch ach o ndrel njêng nau kan đăp mpăn ân ƀon lan:

             ‘ Kônh wa rhơn ngăn ndrel dŭt n’hâm m’ak rnôk hăn săch ntơh măt Quốc hội ndrel Hội đồng nhân dân ăp gưl. Đah kônh wa phung hên, nau kan săch dơi ăp nŭih geh nau blau, nau dơi gay ma rđau nau kan ân neh dak. Phung hên rnơm ngăn tâm nau săch kan bah rơh aơ mra geh ăp nau dơi ueh ngăn”.

            Ôi 23/5, Nar rgum rƀŭn bah lam ƀon lan tâm 660 ntŭk nklăch phiếu bah n’gor Kon Tum kŏ geh tâm nau khuh n’gôr rhơn răm. Jêh rnôk ntoh măt ân rlau 1.100 cử tri ƀon Kon Hra Chót, ntŭk săch kan mrô 6, Phường Thống Nhất, nkuăl ƀon têh Kon Tum nklăch n’ha phiếu săch kan bôk năp, cử tri A Huy rhơn nkoch:

             ‘Gâp lah bu ranh ta Thôn Kon Hra Chót. Ƀon hên rhơn ngăn rnôk săch ăp nŭih lăp kan ntơh măt Quốc hội, Hội đồng nhân dân tŏng nau dơi. Lah geh nŭih geh dơi lăp kan tâm Hội đông, Quốc hội kŏ ŭch mhâm ƀư ân geh nau kơl an kônh wa”.

            Bah năp nê, lơ 22/5, geh nau ân bah Uỷ ban săch kan neh dak, bơi tât 12 rbăn cử tri tâm Tây Nuyên ntơm hăn nklăch phiếu ơm tâm 63 rmôt săch, tâm ne êgh cán bộ, tahen tâm ăp đồn biên phòng, nŭih ƀon lan tâm 6 xã nkuăl n’har bri ndrel nkuăl jru ngai, jêr jŏt. Dơi geh nchrăp ueh ndrel ƀau ân rjăp, nar săch kan ơm tâm Tay Nguyên jêng geh nau dơi ueh, đah bơi tât 100% cử tri hăn săch. Cử tri Cao Trung Hiếu, đồn Biên phòng Đăk Ruê, tahen Biên phòng Dak Lak nkoch nau mĭn rơh bôk năp geh nau dơi ndrel nau kan hăn săch:

             ‘Gâp saơ rhơn ngăn ndrel ntô̆ săk nơm yor aơ lah rơh bôk năp gâp geh hăn nklăch phiếu săhc ntơh măt Quốc hội ndrel HĐND ăp gưl. Lor ma hăn săch gâp hŏ răk nau geh nkoch mpưh nau rêh ndrel nau kan bah ăp nŭih, hŏ nkah ngăn gay ma săch. Gâp rnơm lah hŏ săch ân dơi ăp nŭih geh nau blau ngăn tâm di đah nau ntoh măt ân cử tri phung hên. Ŭch ăp nŭih tă geh nau dơi bu săch lăp kan ngăn ri mra geh nau rgop ngăn nau mĭn, nau dơi ndâk njêng nkuăl n’har bri Dak Lak lah êng ndrel neh dak lah nsum nar lơn ma sâm geh”.

           Cử tri ƀon Kon Hra Chot

  Êng tâm n’gor Kon Tum, ndrel ma nau ƀư nau dơi bah nơm, rmôt tahen Biên phòng hôm mât đăp mpăn rnă njrăng, ndrel 3 xã nkuăl n’har bru lah Đăk Plô, Đăk Nhoong ndrel Đăk Long ƀư ân ueh nar săch kan ơm tâm nkuăl. Knŭng tâm du mông ôi lơ 22/5, rlau 10 rbăn cử tri tâm 6 xã jêr ngăn ndrel 6 Đồn Biên phòng bah 2 nkuăl Đăk Glei, Ngọc Hồi n’gor Kon Tu, jêh nau săch kan ơm, đah bơi tât 12 rbăn cử tri hăn săch, geh bơi tât 100%. Cử tri A No, hăn nklăch phiếu tâm ntŭk nkăch phiếu, xã Đăk Long, nkuăl Glei, n’gor Kon Tum, mbơh:

             ‘Nŭih ƀon lan hăn nklăch phiếu rhơn ngăn. Ăp nŭih hăn nkăch lĕ ro. Yor aơ lah nau kan bah ăp nŭih ƀon lan, gay ma săch luh ăp nŭih geh nau dơi gay ma ntoh măt ân nau mĭn, nau ŭch bah ƀon lan”.

            Săch kan Quốc hội gưl XV ndrel HĐND ăp gưl năm kan 2021-2026 hŏ geh tâm nrôk srê Covid-19 dôl ma tât jêr, nau mra geh ntưp rêng srê tă bah nkuăl n’har bri, yor ri ma nau kan bah ăp cán bộ tahen njrăng der lah nau kan nsum, nkre ma săch săch kan ân tâm di luật, nkre ma mât đăp mpăn rnă njrăng nkuăl n’har bri ndrel njrăng rdâng srê ji, gay ma nar săch lan ngăn lah nar rgum rƀŭn bah lam ƀon lan. Tâm nar rgum têh bah neh dak, lam nkuăl Tây Nguyên geh rlau 4 rkeh 55 rbăn cử tri, kơt lah geh tâm ban tŏng bah 54 rnoi mpôl bah neh dak, ƀư hăn nklăch phiếu tâm 5725 ntŭk săch kan./.

                        Nŭih rblang: H’Thi