VOV4.M’nông – Nar 3/6, ta Ngih pah kan Chính phủ, đah nău ƀư tơm bah Thủ tướng Phạm Minh Chính, Chính phủ lĕ rƀŭn ăp rơh khay 5/2021. Ta rơh rƀŭn, Chính phủ djăt nău mbơh n’hanh tâm nchră mpeh trong kan njrăng n’gang srê Covid-19; uănh lah nu nău wăng sa-rêh jêng, tơm prăk ngih dak khay 5 n’hanh 5 khay năm 2021; nchroh mbơh nu nău wăng sa-rêh jêng, tơm prăk Ngih dak 6 khay bôk năm 2021 n’hanh ăp trong mkra tâm 6 khay dŭt năm 2021; uănh lah săk rnglăy ƀư tĭng trong nchrăp ntuh kơl nsum đêt năm lvang 2016-2020 n’hanh nchrăp trong nchrăp ntuh kơl nsum đêt năm lvang 2021-2025.

Thủ tướng ƀư tơm rơh rƀŭn chính phủ ăp rơh khay

Ntoh ngơi ntơm ƀư rơh rƀŭn, Thủ tướng Phạm Minh Chính mĭn lah, rơh rƀŭn Chính phủ ăp rơh khay 5 ƀư tâm rnôk srê Covid-19 geh jêr jŏt, lam hvi srê ntưp ngăch, ntil kaman klach lơn n’hanh ntưp tâm ăp nkual công nghiệp, ntŭk chroh rƀŭn. Thủ tướng đă ăp nuĭh ntoh măt râng rrbŭn rgum tâm nchră ăp nău tĭng nuih n’hâm: mĭn ngăn, lah ngăn, săk rnglăy ngăn; nuĭh ƀon lan rƀŏng tĭng ngăn. Tă bah nĕ uănh lah di nu nău, n’gluh an ăp trong mkra ƀư tĭng săk rnglăy ăp nău kan tâm khay tât.

Nŭih rblang: Y Sưng Phê Ja