VOV4.M’nông: Di rnôk tât khâl ndrel pah kan đah n’gor Cao Bằng, râng rƀŭn Nar tâm rnglăp ăp rnoi mpôl, Thủ tướng Phạm Minh Chính hŏ tât khâl ndrel nkoch bri đah cán bộ, tahen, ƀon lan nkuăl Trùng Khánh, Cao Bằng. Thủ tướng lah rjăp: bol ma Trùng Khánh lah du nkuăl yôk, nkuăl ngai, nau rêh hom âk nau jêr, yơn đah nau rđau kan bah Đảng, n’gâng kan tâm nkuăl ndrel nau nsôih rlet rlau nau jêr bah kônh wa ăp rnoi oh ôh, nau kan văng sa, rêh jêng hĭ geh âk nau dơi đŏng.

Thủ tướng đă nkuăl Trùng Khánh lŏ ƀư ân rjăp, ƀư ân ueh, săk tam nau ntrŭnh Đại hội XIII bah Đảng, Nau ntrŭnh Đại hội Đảng bộ n’gor tal XX, Nau ntrŭnh bah Đảng bộ nkuăl tal XX mpeh nau hun hao văng sa, rêh jêng, đăp mpăn neh dak, rnă njrăng, tâm nchră ndrel ndâk njêng ntrong kan chính trị./.

Nŭih rblang: H’Thi