VOV4.M’nông: Kêng măng 28/6, ta ngih kan Quốc hội, Kruanh Quốc hội Vương Đình Huệ hŏ tâm nchră đah Tổng Bí thư, Kruanh dak Lào Thongloun Sisoulith . Tổng Bí thư, Kruanh dak Thong-lun Si-su-lith ndrel Kruanh Quốc hội Vương Đình Huệ ân lah, rơh khâl bah Tổng Bí thư, Kruanh dak Lào lah nau ntoh bah nau tâm boh têh, tâm rnglăp ueh ndrel tâm boh ăp ntil Việt Nam-Lào. Bah năp nau tât bah srê Covid-19 dôl tât jêr tâm nkuăl, Việt Nam rnê ngăn ăp nau kan rdâng srê tam ueh bah neh dak Lào ndrel dôl ntrŭnh, lah rjaơ dak Lào mra ơm dơi nkân njrăng srê ji, lŏ ƀư ân dơi nau ntrŭnh Đại hội tal 11 Đảng ƀon lan cách mạng Lào. Tổng Bí thư, Kruanh dak Lào Thong-lun Si-su-lith lah rjăp, rơh tât, Quốc hội bar dak ân lŏ ntrŭt dăng tâm boh, n’hao tâm pă nau blau kan, ngăn lah nau ndâk ntrong kan pháp luật ndrel uănh n’ôi gưl prêh bah ăp ntŭk kan Ngih dak, n’hao lơn tay nau tâm rgop nsum đah ăp Uỷ ban bah 2 Quốc hội tâm nau uănh ƀư nau nchrăp tâm boh kan nsum 2 dak.

           Kêng măng 28/6, ta Ngih pah kan Chính phủ, Thủ tướng Chính phủ Phạm Minh Chính lĕ rgum ôp đah Tổng Bí thư, Kruanh dak Cộng hòa Dân chủ nhân dân Lào Thongloun Sisoulith dôl khân dăch dêh na nê̆ Việt Nam. Tổng Bí thư, Kruanh dak Thongloun Sisoulith nkoch nău răm rhơn plơ̆ tay khâl Việt Nam ta nău kan mhe, mbah rhơn ăp nău geh têh kuăng, lĕ rngôch ƀon lan Việt Nam oh nô dơi geh tâm rơh hun hao wăng sa-rêh jêng n’hanh rgum lăp lam ntŭr neh tâm ăp năm bah năp. 2 đồng chí kruanh tâm rgâl nu nău n’hanh uănh lah prêh ăp trong mkra rdâng đah srê Covid-19 ta ăp dak rnôk bah năp. Bôl geh khuch srê Covid-19, 2 ding lĕ nsrôih mât rgâl rmôt kan n’hanh tâm mâp gưl prêh, mât uĕh săk rnglăy ăp trong ƀư kan ndrel ăp ding ta ăp gưl; kan ndrel ăp nău kan rnă njrăng, mât njrăng bri dak, wăng sa, boăt nthoi ntung trong, ntĭm nti, kan ndrel đah ăp ntŭk hun hao tay; geh prăk tăch rgâl 2 ding 5 khay bôk năm 2021 geh 570, 7 rkeh đôlar, hao bơi 40% nkôp đah rơh năm 2020; Việt Nam geh 208 nău nchrăp ƀư ntuh kơl ta Lào hôm e tam đah dĭng lĕ prăk dăn ƀư 5,16 rmen đôlar Mỹ.

Nŭih rblang: H’Thi