VOV4.M’nông – Ôi 8/7, ta năp nu nău ngăch, jêr jŏt bah srê Covid-19 ta nkual ƀon têh Hồ Chí Minh, jêh rnôk tâm ban ŭch đah nău dăn đă bah Nkual ƀon têh kơt tĭng ntĭm đă 16, Thủ tướng Chính phủ Phạm Minh Chính lĕ ƀư tơm rơh rƀŭn pơk sŏng dăng Chính phủ đah kruanh nkual ƀon têh Hồ Chí Minh gay tâm nchră, tâm ban ŭch nău wât, nău mĭn, trong mkra n’hanh kuăl jă nuĭh ƀon lan nkual ƀon têh lăp ndrel trong chính trị gay ƀư njrăng, n’gang srê Covid-19 tam.

Thủ tướng Chính phủ Phạm Minh Chính ƀư tơm rƀŭn pơk sŏng dăng chính phủ đah kruanh Nkual ƀon têh Hồ Chí Minh mpeh njrăng n’gang srê

Thủ tướng uănh lah prêh nău nsrôih bah nkual ƀon têh Hồ Chí Minh, nău rđău, ƀĭt joet bah gưl ủy, n’gâng kan ăp gưl. Yơn lah tât aƀaơ srê Covid-19 ta nkual ƀon têh hôm e geh jêr jŏt, jêr njrăng, jêr uănh nđôi. Tĭng dăn đă bah Nkual ƀon têh, Rnâng kan Chính phủ, Thủ tướng Chính phủ lĕ ŭch an kơt tĭng trong mkra dăng lơn, ƀư tĭng ntĭm đă 15 tâm ƀah nkual ƀon têh Hồ Chí Minh 15 nar gay nking n’gang, nchăng rdêl, ntrôl rŭch srê ta nkual ƀon têh Hồ Chí Minh. Thủ tướng lah rjăp, ƀư tĭng tâm ƀah kon nuĭh yơn m’hâm ƀư nău rêh bah nuĭh ƀon lan mô geh khuch, đăp mpăn rnă njrăng, an săk soan, nău rêh bah nuĭh ƀon lan bah năp măt. Kơl lor njrăng, n’gang srê Covid-19, kơl lor pă vaccine an nkual ƀon têh Hồ Chí Minh.

Nuĭh rblang: Y Sưng Phê Ja