VOV4.M’nông: Kêng măng 2/7, ta bôk ƀoh nhih pah kan Chính phủ, Thủ tướng Chính phủ Phạm Minh Chính hŏ ƀư tơm rơh hop pơk sŏng dăng Chính phủ đah ăp n'gor mpeh uănh năl nô nău wăng sa- rêh jêng kon nuĭh 6 khay bôk năm n'hanh trong rƀŏng, nău kan 6 khay kêng dŭt năm 2021, gay đăp mpăn tĭng ƀư rnoh tât kan ndrop mpeh pah kan njrăng n'gang  nuh srê , nkre hun hao wăng sa- rêh jêng kon nuĭh. Lah ta rnôk ntơm pơk tâm nchră, Thủ tướng Chính phủ Phạm Minh Chính dăn đă, ăp đại biểu rgum glêh, lăp sŏng tâm nkô̆ nău gay ndơ̆ luh ăp nău kan, trong nkra, rnoh tât kan tâm di. Đah nuih n'hâm lah lơn ma jêr, duh r'al, lơn ma mât uĕh nău tâm ban, mât nău way, rgum bôk rngok gĭt blău nsum, nsing tâm nê uănh tâm nô nău ngăn geh aƀaơ ndơ̆ luh ăp rnoh tât kan, nău kan, trong nkra tâm di, gay tĭng ƀư mhâm an geh nău tam. Lôch rnôk djăt nău mbơh uănh năl mpeh hun hao wăng sa- rêh jêng kon nuĭh 6 khay bôk năm n'hanh trong rƀŏng, nău kan, trong nkra 6 khay kêng dŭt năm 2021, ăp đại biểu hŏ tâm nchră khuh n'gôr uănh năl mpeh ăp nău dơi hŏ geh, ăp nău jêr jŏt, rbăn lhơ ân dơi nkra bah n'hanh ăp nău tă ơm gĭt kan. Mpeh trong rƀŏng nău kan tâm let năp tay Thủ tướng lah rjăp, nsrôih tĭng ƀư rnoh tât kan ndrop n'hanh 2 trong tor hun hao wăng sa ntơm bah 6%-6,5%.

Nuĭh rblang: Điểu Thân