VOV4.M’nông: Kêng măng nar 12/7/2021, Thủ tướng Chính phủ Phạm Minh Chính hŏ kuăl điện tâm nchră đah Thủ tướng Ngih dak Israel Naftali Bennett. Thủ tướng Naftali Bennett rnê âk ăp nău dơi ma Việt Nam rdâng lơh nuh srê Covid-19 tâm bah ri aơ nơh, tâm ban kơt tâm hun hao wăng sa- rêh jêng kon nuĭh n'hanh tâm boh dak bah dih đŏng. Păng lah rjăp, Israel uănh khlay ntrŭt ntrôl tâm boh âk ntil đah Việt Nam. Thủ tướng Chính phủ Phạm Minh Chính mbah rhơn wa Naftali Bennett dơi sơch ƀư Thủ tướng Ngih dak Israel. Tâm rnôk njêng săk mhe ntil kaman ƀư nuh srê Covid-19 nar lơn ma krit nji, Thủ tướng Phạm Minh Chính ŭch rŏng bar ding tâm boh kan nsum lhăt tâm rơh rdâng lơh nuh srê Covid-19. Bar Thủ tướng tâm ban ŭch mbra tâm boh lhăt ndơ̆ tâm boh âk ntil đah bar dak nar lơn ma ngăn ngăn, nsĭt geh nău dơi; ntrôl ngăch tâm nchră, ký ton tâm boh dah rŏng tăch rgâl n'hanh tâm ton tâm boh nuĭh kan đah bar dak; ndơ̆ luh rnoh tât kan âk lơn nsrôih n'hao ntuh kơl, tăch rgâl bah ding, rƀŏng tât sĭt jêng tay wăng bah lôch bah kơi nuh srê têh./.

Nuĭh rblang: Điểu Thân