VOV4.Mnông – Ôi 22/6 ta ngih pah kan N’gâng kan Công an, Thủ tướng Chính phủ Phạm Minh Chính râng ƀư n’glôch jêh ndâk ƀư, mbơh tơih nău nchrăp ƀư Cơ sở Dữ liệu ngih dak mpeh ƀon lan gŭ; Nău nchrăp ƀư nkra njêng, pă n’hanh mât uănh Căn cước nuĭh ƀon lan n’hanh Ƀư mbơh dŏng na nê̆ bah nar 1/7/2021. Ntoh ngơi ta nar ƀư, ndơn măt kruanh Đảng, Ngih dak, Thủ tướng Chính phủ Phạm Minh Chính rnê rhơn ăp nău nsrôih, nsrôih n’hanh geh săk rnglăy bah N’gâng kan Công an, Công an ăp ntŭk; nău nsrôih ndrel ty hăn ndrel, râng geh săk rnglăy bah ăp doanh nghiệp công nghệ thông tin lăp ăp nău nchrăp ƀư, rgop ndâk njêng cơ sở dữ liệu ngih dak mpeh ƀon lan gŭ bah Việt Nam.

Thủ tướng Chính phủ Phạm Minh Chính râng ƀư n’glôch jêh ndâk ƀư, mbơh tơih nău nchrăp ƀư cơ sở dữ liệu ngih dak mpeh ƀon lan

Thủ tướng lah rjăp, aơ lah ăp nău kan khlay, tâm rgop, geh nău rêng hvi, uĕh ngăn ngên, săk rnglăy jŏ jong yơn ntul rlong bah năp măt hôm e âk. Thủ tướng an lah, nău ndâk njêng trong ƀư lôch uĕh mhe knŭng lah bôk năp, ndơ̆ cơ sở dữ liệu aơ hăn tâm nău rêh, mât uĕh săk rnglăy ngăn, nuĭh ƀon lan n’hanh doanh nghiệp dơi dŏng mư lah nău mpŏng kâp bah Đảng, Ngih dak; nău kâp n’hanh mpŏng ŭch bah kon nuĭh n’hanh lĕ rngôch nuĭh ƀon lan.

Nuĭh rblang: Y Sưng Phê Ja