VOV4.M’nông: Tâm nchră tâm boh tâm brê yor ma hun hao kloh uĕh n'hanh rnoh  ŭch tât kan lam ntŭr neh (P4G) 2030 ƀư ntơm bah nar 30-31/5/2021 tĭng trong rƀŏng pơk sŏng dăng ta nâm nău ƀư tơm bah Tổng thống dak tơm jay Hàn Quốc Mun Chê In. Thủ tướng Chính phủ Phạm Minh Chính râng rơh tâm nchră gưl têh đah nău ƀư lah nuĭh ntơm njêng nsum bah P4G. Nău kan dŭt khlay bah Tâm nchră lah rơh tâm nchră gưl têh ƀư măng nar 31/5/2021 (tĭng mông Việt Nam) đah nău tât râng pơk sŏng dăng bah Kruanh rđău kan gưl têh bah ăp dak Hàn Quốc, Đan Mạch, Cô-lôm-bi-a, Kruanh Ủy ban châu Âu, Việt Nam, Hà Lan, Kê-ni-a, Cốt-xơ-ta Ri-ca, Pê-ru, Áo, Thái Lan, Cam-pu-chia, Nuĭh đă hăn kan mha êng mpeh rgâl duh nđik trôk nar bah Tổng thống Hoa Kỳ n'hanh Tổng giám đốc Prăk nkrem lam ntŭr neh (IMF). Ta rơh hop, ăp kruanh rđău kan hŏ rgum tâm nchră pe nkô̆ nău jăch ndăn tâm rơh aƀaơ. Nê lah sĭt jêng tay lôch bah nuh srê Covid-19, nău nsrôih bah nsum mpôl ăp dak lam ntŭr neh tât rnoh tâm ban carbon tât năm 2050 n'hanh n'hao dăng kan yor ma rgâl duh nđik trôk nar n'hanh nta trong dơh an tâm boh bah dih- tâm trôm ngih dak. Lah ta rơh tâm nchră gưl têh, Thủ tướng Chính phủ Phạm Minh Chính lah rjăp tă bah nuh srê n'hanh ăp jêr jŏt, ntul rlong gay an ăp dak saơ kloh lơn đŏng nău khlay bah nău mât njrăng ntŭk gŭ rêh. Thủ tướng dăn đă, ăp dak lam ntŭr neh ân nsum nsuan nkra tâm ban đah ăp nău ŭch jăch ndăn sĭt jêng tay wăng sa đah nău đă nđĭr uĕh n'hanh hun hao nâp dăng lơn bah kơi rơh nuh srê Covid-19.

Nuĭh rblang: Điểu Thân