VOV4.M'nông: Kêng măng 1/11, ta dak Anh, Thủ tướng Chính phủ Phạm Minh Chính hŏ tât râng n'hanh geh nău lah khlay tâm nar bôk năp bah Tâm nchră gưl têh rgâl duh nđik trôk nar dơi ƀư tâm trôm bôk nău kan Tâm nchră tâl 26 ăp Ding râng tâm ton rpaih bah Liên Hợp Quốc mpeh rgâl duh nđik trôk nar (COP26). Thủ tướng lah rjăp rdâng lơh đah rgâl duh nđik trôk nar, dâk hao tay ân jêng nău kan an ƀư lor dâk bôk năp tâm ăp trong n'glêh an hun hao, lah rnoh di nuĭh n'hâm uĕh dŭt têh bah ăp gưl, ăp n'gâng kan, ăp doanh nghiệp n'hanh nuĭh ƀon lan.

Thủ tướng an lah đŏng, ăp nău kan ân nsing tâm trôk nar n'hanh sŏk kon nuĭh ƀư rgum tơm, mô an du hê geh ntlơi êng bah kơi. Dŭt jêh nău lah, Thủ tướng lah rjăp Việt Nam dôl mbrôn lĕ n'hâm suan gay nkre rdâng lơh đah rgâl duh nđik trôk nar, nkre hun hao wăng sa, đăp mpăn nău rêh nar lơn ma uĕh bah nuĭh ƀon lan. Việt Nam ŭch rŏng n'hao dăng pah kan tâm boh đah ăp dak bah dih tâm ăp bôk nău kan, trong nchrăp ntuh kơl n'hanh hun hao nâp dăng tâm let năp tay./.

Nuĭh rblang: Điểu Thân