VOV4.Mnông- Ôi nar 9/11, ta ntŭk kan Chính phủ, Thủ tướng Phạm Minh Chính lĕ vơt kruanh n’gâng kan nchră nău đah dak bah dih Australia Marise Payne di rơh tât khâl Việt Nam. Thủ tướng Phạm Minh Chính rhơn ăp nău dơi geh chính phủ n’hanh ƀon lan Australia lĕ dơi geh tâm rơh pah kan njrăng rdâng nuh srê Covid-19 n’hanh ndâk nsơm, hun hao wăng sa tâm ba năp nơh, lah ueh chính phủ Australia lĕ ton kơl an 5,2 rkeh ding vaccine an Việt Nam n’hanh ŭch mpeh Australia hăn ndrel tay đah Việt Nam tâm nău kan njrăng rdâng nuh srê n’hanh ndâk nsơm, hun hao wăng sa rêh jêng...Thủ tướng rnê âk nău geh rơh rƀŭn nchră kruanh n’gâng kan nchră nău đah dak bah dih tal  3 đah bar dak, an lah aơ lah nău an saơ an nău nsrôih bâh lĕ bar ding ntrôl nău tâm boh kan lĕ rngôch. Thủ tướng Phạm Minh Chính đăn đă mpeh đah Australia geh mât tay nău kơl an huhn hao ngăn ngên an Việt Nam n’hanh uănh n’hêl pơk mpông an ntŭk tăch rgâl an du đê̆ ntil ndơ tuch tăm-mât rong tui ka tăch an dak bah dih bâh Việt Nam tâm ban kơt uănh n’hêl mbơh tơih bôk nău kan uănh pah kan tuch tăm an nuĭh kan Việt Nam, ntrŭt đă doanh nghiệp bar dak ntuh kơl tăch rgâl.

Nuĭh rblang: Thị Đoắt